नेपाल स्टक एक्सचेन्ज नेप्सेले शेयर लगानीकर्ताको गुनासो सुनुवाईका लागि आवश्यक प्रबन्ध गर्न सम्पूर्ण ब्रोकरहरुलाई निर्देशन दिएको छ। आफ्ना ग्राहकहरुबाट आउने गुनासाहरुको उचित सुनुवाई गरी यथाशिघ्र समस्या समाधान गर्ने दायित्व सम्बन्धित ब्रोकरको नै भएको हुँदा लगानीकर्ताहरुबाट प्राप्त हुने गुनासाहरु सुनुवाईका लागि आवश्यक प्रबन्ध गरी सो को जानकारी गराउन नेप्सेले निर्देशन दिएको हो।
धितोपत्र कारोबार सञ्चालन तथा कारोबार व्यवस्थापन प्रणाली (TMS) सञ्चालन सम्वन्धी जिज्ञासा तथा सञ्चालनका क्रममा लगानीकर्ताहरुले भोगेका विभिन्न समस्या एवं गुनासाहरुहरुको सम्बन्धित सदस्य दलालबाट यथोचित सम्बोधन गरी समस्या समाधान गर्ने कार्य नभएको भनी नेप्सेमा पटकपटक लगानीकर्ता एवं सम्बन्धित सरोकारवालाहरुबाट गुनासा एवं उजुरीहरु प्राप्त हुन आएको भन्दै नेप्सेले यस्तो निर्देशन दिएको हो।
विशेषगरी शेयर बेचेको रकम समयमा नपाएको तथा किनेको शेयर समयमा खातामा नआएको गुनासो लगानीकर्ताले गर्ने गरेका छन् ।
