नेपाल धितोपत्र बोर्डले ब्रोकर नम्बर ५५ भृकुटी स्टक ब्रोकिङ कम्पनीलाई निलम्बन गर्दै स्पष्टीकरण सोधेको छ । सोमबार साँझ बसेको धितोपत्र बोर्डको संचालक समितिको बैठकले उक्त ब्रोकरको लाईसेन्स निलम्बन गर्दै स्पष्टीकरण सोध्ने निर्णय गरेको हो।
अहिले सम्पत्ति सुद्धीकरण अनुसन्धान विभागले व्यवसायी दीपक भट्टलाई पक्राउ गरेर अनुसन्धान गरिरहेको छ । प्रारम्भिक अनुसन्धानमा भट्टले ३ अर्ब ८१ करोड अनिमिताता गरेको देखिएको छ । विभागका अनुसार भट्टले दोस्रो बजारबाट नेपाल रिइन्स्योरेन्स कम्पनी लगायतका विभिन्न कम्पनीहरुको शेयर खरिद गर्न हिमालयन रिइन्स्योरेन्सको २ अर्ब ७३ करोड ३३ लाख रुपैयाँ, यसकै सहायक कम्पनी हिमालयन सेक्युरिटिज बैंकरको २२ करोड १९ लाख रुपैयाँ, एचएलआई लार्ज क्याप फण्डको २५ करोड १४ लाख र नेपाल माइक्रो इन्सुरेन्स कम्पनीको १६ करोड १७ लाख रकम दुरुपयोग गरेको देखिएको छ । उनले यी कम्पनीहरुको रकम दुरुपयोग गरेर ब्रोकर नम्बर ५५ भृकुटी स्टक ब्रोकिङ कम्पनीमार्फत शेयर खरिद गरी भुक्तानी गरेको विभागको प्रारम्भिक अनुसन्धानले देखाएको छ ।
ब्रोकर कम्पनीले भट्टको लागि शेयर खरिदको कार्य गर्द कानूनी व्यवस्थाहरु पालना नगरेको, ग्राहक पहिचान फारमको सम्पुष्टि नगरेको, कानून बमोजिम राख्नु पर्ने कोल्याट्रल नलिएको, नेप्से र बोर्डको निर्देशन पालना नगरेकोले देखिएकोले ब्रोकरलाई निलम्बन गरिएको हो । भट्टको लागि शेयर खरिद गर्दा त्यसको भुक्तानी विभिन्न संस्था र व्यवसायीको नामबाट तिरिदिएको अनुसन्धानमा खुलेको छ।
