जनता एग्रे फरेष्ट्री लिमिटेडले संस्थापक सेयर संकलनको काम करिब करिब टुङ्ग्याएको छ । २ अर्ब ५० करोड चूक्ता पूँजी र ३ अर्ब अधिकृत पूँजी रहेको यो कम्पनीले संस्थापक सेयरधनी बन्न इच्छुक लगानीकर्ताबाट २ अर्ब रुपैयाँ संकलन गर्नेछ । यसमध्ये हालसम्म करिब ९५ प्रतिशत लगानी जुटिसकेको छ । अबको केही दिनमै संस्थापक सेयर संकलनको काम बन्द गर्ने योजनामा कम्पनी छ ।
कम्पनीका प्रबन्ध निर्देशक भोजबहादुर शाहका अनुसार कम्पनीले ५० करोडको सार्वजनिक निष्काशन (आईपीओ) जारी गर्नेछ । पूँजीका आधारमा देशकै सबैभन्दा ठूलो कषि कम्पनीका रुपमा रहेको जनता एग्रोले आगामी आर्थिक वर्ष २०८३/०८४ मा आईपीओ जारी गर्ने लक्ष्य राखेको छ ।
जनता एग्रो र यसका भगिनी कम्पनीसँग गरेर अहिले आफ्नै १६१ बिघा जमिनमा व्यवसायिक खेती भइरहेको छ । साथै, देशका विभिन्न ठाउँमा जग्गा भाडामा लिएर कम्पनीले व्यवसायिक खेती पनि अघि बढाइरहेको छ । झापामा ४ ठाउँ, अर्घाखाँचीमा एक ठाउँ, लमजुङमा एक ठाउँ र काभ्रेका एक स्थानमा व्यवसायिक खेती भइरहेको प्रबन्ध सञ्चालक शाहले जानकारी दिए । उनका अनुसार नवलपुरमा ५ बिघा र काठमाडौँको जर्सिङपौवामा १०० रोपनी जमिन भाडामा लिएर अहिले खेती सुरु भएको छ । यीमध्ये केही स्थानमा ‘पियोर अर्गानिक’ खेती भइरहेको छ ।
कम्पनीले काठमाडौँ र ललितपुरमा गरेर आफ्नै ७ वटा स्टोरसमेत सञ्चालनमा ल्याएको छ । साथै, भाटभटेनीका सबै आउटलेटमा जनता एग्रोका उत्पादन बिक्री भइरहेका छन् । सेल्सबेरी, ब्लुबेरी, बिगमार्ट जस्ता सुपरस्टोरहरुमा पनि जनता एग्रोले माटो र आशापुरी ब्राण्डमा उत्पादन गरेका कृषि उपजहरु बिक्री भइरहेका छन् । साथै, स्कुल तथा कलेजका क्यान्टिनहरुमा पनि यसका उत्पादनहरु पुगिरहेका छन् ।
आगामी आर्थिक वर्षभित्रमा आईपीओ निष्काशन गर्नका लागि कम्पनीले सिद्धार्थ क्यापिटललाई बिक्री प्रबन्धकमा नियुक्त गरिसकेको छ । अहिले रेटिङको काम चालु अवस्थामा रहेको शाहको भनाइ छ ।
कम्पनीका सञ्चालहरुमा पवन गोल्यान अध्यक्ष छन् भने उपाध्यक्षमा राजेशकाजी श्रेष्ठ, प्रबन्ध निर्देशकमा भोजबहादुर शाह छन् । उपाध्यक्षमा राजेशकाजी श्रेष्ठसहित सञ्चालकहरुमा कमलेश कुमार अग्रवाल, केशब बहादुर रायमाझी, प्रेम लामा, परितोष पौड्याल, नरबहादुर कार्की र उपेन्द्र केशरी न्यौपाने रहेका छन् ।
कम्पनीमा हाल १५० जना कर्मचारी छन् । देशकै ठूलो कृषि कम्पनी बनाउने राखिएको बताउँदै शाहले अहिले करार खेतीको नमूना उदाहरणसमेत आफूहरुले प्रस्तुत गरिसकेको जनाएका छन् । अहिले देशका विभिन्न पालिकाहरुमा जनता एग्रोले सम्बन्धित पालिका र कृषक समूहसँग करार खेतीको सम्झौता नै गरेको छ ।
