सोपान फर्मास्युटिकल्स लिमिटेडले सर्वसाधारणलाई आईपीओ निष्काशन मिति परिवर्तन गरेको छ । कम्पनीले यस अघि वैशाख २ गतेदेखि वैशाख ६ गतेसम्म आम सर्वसाधारणलाई आईपीओ निष्काशन गर्ने जनाएको थियो ।
तर सरकारले आइतबार पनि सार्वजनिक विदा दिएकोले सोहि अनुसार मिति परिमार्जन गरिएको कम्पनीले जनाएको छ। अब कम्पनीले वैशाख ३ गतेदेखि वैशाख ८ गतेसम्म आईपीओ निष्काशन गर्ने छ। कम्पनीले आम सर्वसाधारणलाई ३४ लाख ७४ हजार ९ सय कित्ता शेयर निष्काशन गर्न लागेको हो ।
आवेदन दिंदा न्युनतम १० कित्ता र अधिकतम अधिकतम ११ हजार कित्ताको लागि आवेदन दिन सकिने छ। शेयर निष्काशनको लागि एनएमबि क्यापिटल बिक्री प्रबन्धक रहेको छ।
कम्पनीले यस अघि नै वैदेशिक रोजगारीमा रहेका नेपालीलाई आईपीओ निष्काशन गरि बाँडफाँड गरिसकेको छ । नेपाल धितोपत्र बोर्डले फागुन १७ गते कम्पनीलाई आईपीओ निष्काशनको अनुमति दिएको हो। शेयर सूचीकरण पश्चात सोपान फर्मास्युटिकल्स नेप्सेमा सूचीकृत हुने दोस्रो औषधि उत्पादक कम्पनी हुने छ ।
कम्पनीका अध्यक्ष डा. अनिल पोखरेल हुन् भने अन्य संचालकमा भिम लाल पौड्याल, कृति कुमारी महतो, अनिश शाह र आङ दोर्जी लामा रहेका छन् । कम्पनीका सीइओ सुमन न्यौपाने हुन् । कम्पनीमा सोपान मल्टिपलको ४९ प्रतिशत शेयर स्वामित्व रहेको छ ।
