प्रिमियममा आईपीओ निष्काशनको अनुमति माग गरेको सेन्चुरी इनर्जी लिमिटेडले अब अंकित मूल्य मै आईपीओ निष्काशन गर्ने भएको छ । कम्पनीले चैत्र १ गते धितोपत्र बोर्डलाई बुझाएको पछिल्लो विवरण अनुसार अब प्रति शेयर १०० रुपैयाँमै कम्पनीले शेयर निष्काशन गर्ने छ।
अंकित मूल्यमा शेयर निष्काशन गर्ने भएपछि कम्पनीले आईपीओको आकार बढाएको छ। यस अघि कम्पनीले प्रति शेयर २७५ रुपैयाँ ११ पैसामा ३ लाख कित्ता शेयर निष्काशनको अनुमति मागेको थियो । अब भने कम्पनीले १०० रुपैयाँमा ५ लाख १० हजार कित्ता शेयर निष्काशन गर्ने गरि अनुमति मागेको छ। शेयर निष्काशनको लागि एनआईबिएल एस क्यापिटल बिक्री प्रबन्धक रहेको छ।
यस कम्पनीले सिन्धुपाल्चोक ९९७ किलोवाट क्षमताको हाडि खोला सुनकोशी ए साना जलविद्यतु आयोजना निमार्ण सम्पन्न गरि २०७७ भदौ १२ गतेबाट विद्युत उत्पादन गरिरहेको छ । यस आयोजनाको निमार्ण लागत २४ करोड मध्ये ८ करोड स्वपूजी र बाँकि बैंक ऋण रहेको छ। यस कम्पनीको अध्यक्ष डा. कृष्ण प्रसाद दुलाल हुन्।
नेप्सेमा सूचीकृत कम्पनी मध्ये हाल सबै भन्दा सानो आयोजना कुथेली बुखरीको छ । कुथेलीले ०.९९८ मेगावाट क्षमताको सुस्पा बुखरी खोला जलविद्युत आयोजना निर्माण सम्पन्न गरि सन् २०१५ सेप्टेम्बरदेखि विद्युत उत्पादन गरिरहेको छ। सेन्चुरी इनर्जीको आयोजना कुथेलीको भन्दा पनि सानो हो ।
यद्यपि कम्पनीले चम्पावती हाइड्रो पावर लिमिटेडबाट गोरखामा निर्माण भएको ७ मेगावाको चेपेखोला जलविद्युत आयोजनामा पनि लगानी गरेको छ।
