सूर्यकुण्ड हाइड्रो इलेक्ट्रिक लिमिटेडले वैदेशिक रोजगारीमा रहेका नेपालीलाई निष्काशन गरेको आईपीओ बाँडफाँड भएको छ। बिक्री प्रबन्धक कुमारी क्यापिटलले आज शेयर बाँडफाँड गरेको हो।
कम्पनीले पुस ९ गतेदेखि पुस १४ गतेसम्म वैदेशिक रोजगारीमा रहेका नेपालीलाई ६८ हजार ९ सय ६७ कित्ता शेयर निष्काशन गरेको थियो। क्यापिटलका अनुसार यस आईपीओमा ७० हजार ४ सय ५७ जनाको आवेदन परेको थियो। जस मध्ये ७० हजार ४ सय ४५ जनाको आवेदन मात्र योग्य भएको छ।
माग भन्दा बढीको आवेदन परेकोले गोलाप्रथाबाट शेयर बाँडफाँड गरिएको छ। जस अनुसार ६ हजार ८ सय ९६ जनाले शेयर पाएका छन्, जस मध्ये ७ जनाले ११ कित्ता शेयर पाएका छन् भने अरुले १० कित्ता शेयर पाएका छन् । बाँकि आवेदक भने हात खाली भएका छन्।
कम्पनीले पुस २३ गतेसम्म स्थानीयलाई आईपीओ निष्काशन गर्ने छ । सो आईपीओ बाँडफाँडपछि कम्पनीले सर्वसाधारणलाई शेयर निष्काशन गर्ने छ ।
नेपाल धितोपत्र बोर्डले मङ्सिर २५ गते कम्पनीलाई आईपीओ निष्काशनको अनुमति दिएको हो । यस कम्पनीले नुवाकोट जिल्लाको दुप्चेश्वर गाउँपालिकामा ११ मेगावाट क्षमताको माथिल्लो तादी खोला जलविद्युत आयोजना निर्माण सम्पन्न गरि गत साउन देखि नेपाल विद्युत प्राधिकरणलाई विद्युत बिक्री गर्दै आएको छ ।
यस कम्पनीमा अपि पावर कम्पनी लिमिटेडको बहुमत सेयर लगानी रहेको छ ।
