हाइड्रोइलेक्ट्रीसीटी इन्भेष्टमेन्ट एण्ड डेभलपमेन्ट कम्पनी (एचआइडिसिएल) ले हकप्रदमा अवितरित १ करोड ६८ लाख कित्ता बढी संस्थापक शेयर लिलाम गर्ने भएको छ । कम्पनीले हकप्रदमा अवितरित संस्थापक समुहको १ करोड ६८ लाख ५९ हजार ५० कित्ता शेयर लिलाम गर्ने भएको हो ।
कम्पनीले यी शेयर साउन २९ देखि भदौ ६ गतेसम्म लिलाम गर्न लागेको हो । कम्पनीले यी शेयरको मूल्य न्युनतम १०० रुपैयाँ तोकेकोले सो वा सो भन्दा बढी मूल्य कबोल गरि आवेदन दिनु पर्ने पर्ने छ। आवेदन दिंदा न्युनतम १०० कित्ता र अधिकतम सबै कित्ताको लागि आवेदन दिन सकिने छ । ५ लाख भन्दा बढीको आवेदन दिंदा प्यान नम्बर अनिवार्य आवश्यक पर्ने छ।
शेयर लिलामको लागि ग्लोबल आईएमइ क्यापिटल बिक्री प्रबन्धक रहेको छ । काठमाडौँमा क्यापिटलको कार्यालय नक्साल र ग्लोबल आईएमई बैंकको शंखमुल शाखाबाट आवेदन दिन सकिने छ । काठमाडौँ बाहिर भने आवेदन दिनको लागि ग्लोबल आईएमई बैंकको १४ शाखा तोकिएका छन् ।
लिलाम प्रक्रियाबाट प्राप्त यी शेयर नेपाल स्टक एक्सचेन्ज नेप्सेमा hidclp सिम्बलबाट सजिल्यै कारोबार हुन सक्ने छन् । कम्पनीले यस अघि पटक पटक हकप्रदमा अवितरित संस्थापक शेयर लिलाममा ल्याए पनि पुरा बिक्री हुन सकेको थिएँन । अब भने नेप्सेमा शेयर मूल्य बढेपछि फेरी संस्थापक शेयर लिलाममा ल्याएको हो । यो समाचार तयार पार्दासम्म नेप्सेमा यी शेयरको शेयर मूल्य १२९ रुपैयाँ ४० पैसा रहेको छ।
