खानी खोला हाइड्रोपावर कम्पनी लिमिटेडले हकप्रद कार्तिक १२ गतेदेखि हकप्रदमा अवितरित शेयर लिलाम गर्ने भएको छ । कम्पनीले हकप्रदमा बिक्री नभएको सर्वसाधारण समूहको ४ लाख ५९ हजार ३ सय ४९ कित्ता शेयर लिलाम गर्न लागेको हो।
यस लिलामी प्रक्रियाको लागि सिटिजन्स क्यापिटल बिक्रि प्रबन्धक रहेको छ । कम्पनीले यी शेयरको न्युनतम मूल्य १०० रुपैयाँ कायम गरेकोले सो भन्दा बढी मूल्य कबुल गरि आवेदन दिनु पर्ने छ । सबै भन्दा बढी मूल्य कबुल गर्नेले शेयर पाउने छ । त्यसपछि पनि शेयर बाँकि रहेमा दोस्रो बढी मूल्य कबुल गर्नेले शेयर पाउने छ । यहि प्रक्रिया अनुसार शेयर बाँकि नरहेसम्म शेयर बाँडफाँड हुने छ।
लिलामीको शेयरमा आवेदन दिंदा न्युनतम १०० कित्ताको लागि आवेदन दिनु पर्ने छ। अधिकतम भने पुरै शेयरको लागि आवेदन दिन सकिने छ । आवेदन दिनको लागि कार्तिक १९ गतेसम्मको म्याद तोकिएको छ ।
काठमाडौँ जिल्ला भित्र सिटिजन्स क्यापिटलको कार्यालय डिल्लीबजारबाट शिलबन्दी फारम लिएर त्यहि आवेदन दिन सकिने छ । काठमाडौँ बाहिर भने सिटिजन्स बैंकको शाखाहरु कुमारीपाटी, ठीमी, इटहरी, बिराटनगर, बिर्तामोड, बिरगंज, सुर्खेत, जनकपुर (भानुचोक), नेपालगंज, नारायणगढ, धनगढी, पोखरा (न्यूरोड), बुटवल (पाल्पा रोड) र हेटौंडा शाखाबाट आवेदन दिन सकिने छ ।
कम्पनीले भदौ ३ देखि असोज ५ गतेसम्म १:१ को अनुपातमा हाल कायम चुक्ता पुंजीको १०० प्रतिशतले हुन आउने ४६ करोड ५७ लाख १४ हजार ३ सय रुपैयाँको ४६ लाख ५७ हजार १ सय ४३ कित्ता हकप्रद शेयर निष्काशन गरेको थियो। क्यापिटलका अनुसार यस हकप्रदमा रितपुर्वक आवेदन दिने आवेदकलाई ४१ लाख ९७ हजार ७ सय ९४ कित्ता शेयर असोज २१ गते बाँडफाँड गरिएको थियो। बिक्री नभएको शेयर लिलाममा आउन लागेको हो।
नेपाल धितोपत्र बोर्डले असार १० गते कम्पनीलाई हकप्रद निष्काशनको अनुमति दिएको थियो।
