राप्ती हाइड्रो एण्ड जनरल कन्स्ट्रक्सन लिमिटेडले साउन १३ गतेदेखि हकप्रदमा अवितरित शेयर लिलाम बिक्री गर्ने भएको छ। कम्पनीले सर्वसाधारण समूहको कुल ७ लाख ४ हजार १ सय ११ कित्ता शेयर लिलाम गर्न लागेको हो।
जस मध्ये १ लाख ४० हजार १ सय १ कित्ता शेयर लकइनमा रहेको शेयर हुन्, जसको लकइन अवधि यहि साउन ८ गते सकिने छ। बाँकि ५ लाख ६४ हजार १० कित्ता शेयर लकइनमा नरहेका शेयर हुन् ।
यस लिलामी प्रक्रियाको लागि मुक्तिनाथ क्यापिटल बिक्रि प्रबन्धक रहेको छ । कम्पनीले यी शेयरको न्युनतम मूल्य १०० रुपैयाँ कायम गरेकोले सो भन्दा बढी मूल्य कबुल गरि आवेदन दिनु पर्ने छ । सबै भन्दा बढी मूल्य कबुल गर्नेले शेयर पाउने छ । त्यसपछि पनि शेयर बाँकि रहेमा दोस्रो बढी मूल्य कबुल गर्नेले शेयर पाउने छ । यहि प्रक्रिया अनुसार शेयर बाँकि नरहेसम्म शेयर बाँडफाँड हुने छ।
लिलामीको शेयरमा आवेदन दिंदा न्युनतम १०० कित्ताको लागि आवेदन दिनु पर्ने छ। अधिकतम भने पुरै शेयरको लागि आवेदन दिन सकिने छ । यस लिलामीमा साउन २० गतेसम्म आवेदन दिन सकिने छ।
काठमाडौँ भित्र मुक्तिनाथ क्यापिटलको कार्यालय नक्सालबाट शिलबन्दी फारम लिएर त्यहि आवेदन दिन सकिने छ । काठमाडौँ बाहिर भने मुक्तिनाथ विकास बैंकको शाखाहरु विराटनगर, बिर्तामोड, बिरगंज, जनकपुर, हेटौडा, नारायणगढ, , बुटवल, पोखरा, बाग्लुंग, घोराही, नेपालगंज, विरेन्द्रनगर, धनगढी, र महेन्द्रनगर शाखाबाट आवेदन दिन सकिने छ । त्यस्तै काठमाडौँ उपत्यकामा ठिमी र कुमरिपाटी शाखाबाट पनि आवेदन दिन सकिने छ।
कम्पनीले असार १ गतेदेखि असार २४ गतेसम्म १:१ को अनुपातमा हाल कायम चुक्ता पुंजीको शतप्रतिशतले हुन आउने ६१ करोड २७ लाख ९३ हजार ८ सय रुपैयाँ बराबरको ६१ लाख २७ हजार ९ सय ३८ कित्ता हकप्रद शेयर निष्काशन गरेको थियो। हकप्रदमा रितपूर्वक आवेदन दिने ७१ हजार ६५ जनालाई ५४ लाख २३ हजार ८ सय २७ कित्ता शेयर बाँडफांड गरिएको थियो । बिक्री नभएको ७ लाख ४ हजार १ सय ११ कित्ता शेयर लिलाम हुन लागेको हो।
