नेपाल स्टक एक्सचेन्ज नेप्सेले अब ब्रोकरहरुले गर्ने गरेको शेयरको खरिद तथा बिक्री रकमको विवरण पनि सार्वजनिक गर्ने भएको छ । यस अघि ब्रोकर अनुसारको कारोबार विवरण प्रकाशित नहुने गरेकोमा अब भने हरेक ब्रोकरको खरिद र बिक्रीको विवरण सार्वजनिक हुने भएको हो ।
नेप्सेका प्रवक्ता मुराहरी पराजुलीका अनुसार नेप्सेको वेबसाइटमार्फत प्रकाशित हुँदै आएको मासिक तथा वार्षिक कारोबार प्रतिवेदनमा ब्रोकर (कारोबार सदस्य) अनुसारको खरिद तथा विक्री रकम उपलब्ध हुने छ। यस्तो विवरण हरेक महिना र वार्षिक विवरण आर्थिक वर्ष सकिएपछि प्रकाशन हुने नेप्सेले जनाएको छ ।
जस अनुसार नेप्सेले आज आर्थिक वर्ष २०८१/८२ को वार्षिक विवरण प्रकाशन गरेको छ । जसमा कुल ९२ ब्रोकरहरु मध्ये ब्रोकर नम्बर ५८ अर्थात् नासा सेक्युरिटिजले गत आर्थिक वर्षमा सर्वाधिक २ खर्ब ५८ अर्ब ४२ करोड बढीको कारोबार गरेको छ । त्यस्तै ब्रोकर नम्बर ४५ अर्थात् इम्पेरीयल सेक्युरिटिजले १ अर्ब ७० करोडको कारोबार गरेको छ । यो खरिद गरिएको रकम र बिक्री गरिएको रकम समेतको कारोबार हो ।
एक खर्ब बढीको कारोबार गर्ने अन्य ब्रोकरमा भिजन सेक्युरिटिज, सनी सेक्युरिटिज, अनलाइन सेक्युरिटिज, आर्यातारा इन्भेष्टमेन्ट, डायनामिक मनि म्यानेजर्स र दीपशिखा रहेका छन् ।
सबैभन्दा कम शेयर कारोबार गर्ने ब्रोकर भने ब्रोकर नम्बर ७३ अर्थात् मनि वर्ल्ड शेयर एक्सचेन्ज र ब्रोकर नम्बर ७९ पाही इन्भेष्टमेन्ट रहेका छन् । यी ब्रोकरले क्रमश १२ करोड ७६ लाख र ४० करोड २२ लाखको कारोबार गरेका छन् । यी दुई बाहेक अन्य सबै ब्रोकरले १ अर्ब बढीको कारोबार गरेका छन् ।
हेर्नुस् आर्थिक वर्ष २०८१/८२ मा सम्पूर्ण ब्रोकरले गरेका कारोबारको विवरण:
