भदौ २३ र २४ गते भएका विभिन्न क्षति, आगजनी र लुटपाटको बीमा कम्पनीहरुमा २३ अर्ब बढीको बीमा दाबी परेको छ । नेपाल बीमा प्राधिकरणका अनुसार असोज ८ गतेसम्ममा विभिन्न १८ वटा बीमा कम्पनीहरुमा २३ अर्ब बढीको बीमा दाबी परेको छ ।
प्राधिकरणको तथ्यांक अनुसार हालसम्म १८ वटा कम्पनीमा २९८८ वटा बीमा दाबी परेको छ, जसको कुल रकम २३ अर्ब ३९ करोड २७ लाख १० हजार रुपैयाँ रहेको छ । जसमा सबैभन्दा धेरै बीमा दाबी सिद्धार्थ प्रिमियर इन्स्योरेन्समा परेको छ। कम्पनीमा ५ अर्ब ४५ करोड ९३ लाखको बीमा दाबी परेको छ ।
त्यस्तै दि ओरियन्टल इन्स्योरेन्समा ५ अर्ब २३ करोडको बीमा दाबी परेको छ । भदौ २४ गते नक्सालमा रहेको होल्टन होटेलमा आगजनी भएको थियो । सो को बीमा ओरियन्टलमा रहेको थियो।
अर्ब बढीको बीमा दाबी पर्ने अन्य कम्पनीहरुमा आईजीआई प्रुडेन्शियल इन्स्योरेन्स, शिखर इन्स्योरेन्स, सगरमाथा लुम्बिनी इन्स्योरेन्स, हिमालयन एभरेष्ट इन्स्योरेन्स र नेको इन्स्योरेन्स रहेका छन् ।
लघुबीमा कम्पनीहरुमा पनि बीमा दाबी परेको छ । जसमा प्रोटेक्टिभ माइक्रो इन्स्योरेन्समा सबैभन्दा धेरै १ करोड १५ लाखको बीमा दाबी परेको छ भने स्टार माइक्रो इन्स्योरेन्समा ७२ लाख ३८ हजारको बीमा दाबी परेको छ ।
बीमा दाबी पर्ने क्रम जारी नै रहेकोले यो रकम बढ्ने निश्चित छ ।
हेर्नुस् कुन कम्पनीमा कति दाबी ?
