भदौ २३ र २४ गते भएका विभिन्न क्षति, आगजनी र लुटपाटको बीमा कम्पनीहरुमा बीमा दाबी पर्न थालेको छ । नेपाल बीमा प्राधिकरणका अनुसार भदौ ३१ गतेसम्ममा विभिन्न १८ वटा बीमा कम्पनीहरुमा २० अर्ब बढीको बीमा दाबी परेको छ ।
प्राधिकरणको तथ्यांक अनुसार हालसम्म १८ वटा कम्पनीमा १९८४ बीमा दाबी परेको छ, जसको कुल रकम २० अर्ब ७० करोड ३८ लाख १४ हजार रुपैयाँ रहेको छ । जसमा सबैभन्दा धेरै बीमा दाबी दि ओरियन्टल इन्स्योरेन्समा परेको छ । कम्पनीमा ५ अर्ब १४ करोड ७९ लाखको दाबी परेको छ । भदौ २४ गते नक्सालमा रहेको होल्टन होटेलमा आगजनी भएको थियो । सो को बीमा ओरियन्टलमा रहेकोले ओरियन्टलमा परेको बीमा दाबी सबैभन्दा धेरै छ ।
त्यस्तै सिद्धार्थ प्रिमियर इन्स्योरेन्समा ४ अर्ब ९३ करोडको बीमा दाबी परेको छ भने शिखर इन्स्योरेन्समा २ अर्ब ३९ करोडको बीमा दाबी परेको छ । अर्ब बढीको बीमा दाबी पर्ने कम्पनीहरुमा आईजीआई प्रुडेन्शियल इन्स्योरेन्स , सगरमाथा लुम्बिनी इन्स्योरेन्स, हिमालयन एभरेष्ट इन्स्योरेन्स र नेको इन्स्योरेन्स रहेका छन् ।
लघुबीमा कम्पनीहरुमा पनि बीमा दाबी परेको छ । जसमा प्रोटेक्टिभ माइक्रो इन्स्योरेन्समा सबैभन्दा धेरै १ करोड १३ लाखको बीमा दाबी परेको छ भने स्टार माइक्रो इन्स्योरेन्समा ६७ लाख ७ हजारको बीमा दाबी परेको छ ।
बीमा दाबी पर्ने क्रम जारी नै रहेकोले यो रकम बढ्ने निश्चित छ ।
हेर्नुस् कुन कम्पनीमा कति दाबी ?
