सगरमाथा क्षेत्रमा घुमफिरमा जान रामेछापको मन्थली पुगेका पर्यटक नियमित हवाई उडान नसक्दा अलपत्र परेपछि नेपाली सेनाको जहाजबाट उद्दार गरिने भएको छ ।
पदयात्रा व्यवसायीको छाता संस्था ट्रेकिङ एजेन्सिज एसोसिएसन अफ नेपाल (टान)ले मन्थलीमा रोकिएका पर्यटकको विवरण उपलब्ध गराउन आफ्ना सदस्य कम्पनीहरुलाई आग्रह गरेको छ । मन्थलीमा फसेका पर्यटकहरुलाई नेपाली सेनाको जहाजबाट मन्थली–लुक्ला–मन्थली वा काठमाडौं–लुक्ला–काठमाडौं रुटमा स–शुल्क उडान गर्ने गरी सेनासँग समन्वय गरिएको भन्दै टानले मन्थलीमा रोकिएका पर्यटकको विवरण उपलब्ध गराउन आफ्ना सदस्य कम्पनीहरुलाई आग्रह गरेको हो ।
‘फस्ट कम फस्ट सर्भ’ सिद्धान्त अनुसार ट्रेकिङ एजेन्सीबाट प्राप्त हुने नामको सूची अनुसार पर्यटकलाई प्राथमिकता साथ उडाइने र नेपाली सेनासँगको परामर्शपछि उडान समय र शुल्क तोकिने टानले जनाएको छ ।
