चालु आर्थिक वर्षको पहिलो महिनामा घरजग्गा कारोबार गत वर्षको तुलनामा बढेको छ । साउनमा घरजग्गा कारोबार र कारोबारबापत सरकारले पाउने राजस्व दूबैमा सुधार आएको देखिएको हो ।
भूमि व्यवस्थापन तथा अभिलेख विभागका अनुसार साउनमा कुल ४३ हजार ८३५ लिखत पारित भएको छ । गत आव २०८०/८१ साउनमा ३९ हजार २६३ लिखत पारित भएको थियो । यसपालीको साउनमा भएको लिखत पारित गत वर्षको साउनमा भएको लिखत पारितको तुलनामा ११.६४ प्रतिशतले बढी हो ।
गत आर्थिक वर्षको अन्तिम महिना असार (२०८१ असार)को तुलनामा भने साउनमा घरजग्गा कारोबार केही घटेको देखिन्छ । असारमा ४४ हजार ५६९ लिखत पारित भएको थियो ।
गत वर्षको साउनको तुलनामा यसपालीको साउनमा घरजग्गा कारोबारसँगै राजस्व पनि बढेको छ । साउनमा ३ अर्ब ८३ करोड ५१ लाख रुपैयाँ राजस्व संकलन भएको छ । गत आर्थिक वर्षको सउनको तुलनामा यसपाली साउनमा उठेको राजस्व ३१.७७ प्रतिशतले बढी हो । साउन २०८० मा घरजग्गा कारोबारबाट २ अर्ब ९१ करोड ४ लाख बराबर राजस्व प्राप्त भएको थियो ।
साउनमा प्राप्त भएको ३ अर्ब ८३ करोड ५१ लाख राजस्वमध्ये २ अर्ब ५५ करोड १९ लाख ५१ हजार रजिस्ट्रेसन दस्तुर छ । १ अर्ब ३४ करोड ६९ लाख ४९ हजार रुपैयाँ पूँजीगत लाभकर छ । २६ करोड ६८ लाख ६९ हजार सेवाकर प्राप्त हुँदा ३६ करोड ७८ लाख २८ हजार राजस्व छुट दिइएको विभागको तथ्यांक छ ।
साउनमा सबैभन्दा धेरै लिखत पारित इनरुवा मालपोत सुनसरीबाट भएको छ । उक्त कार्यालयबाट १ हजार ९ सय ४ लिखत पारित भएको छ ।
भूमि सुधार तथा मालपोत कार्यालय राजविराज सप्तरीबाट १ हजार ६ सय ८, बेलबारी मालपोत कार्यालय मोरङबाट १ हजार ५ सय २०, भद्रपुर मालपोत झापाबाट १ हजार ४ सय ६५ र जनकपुरधाम मालपोत कार्यालय धनुषाबाट १ हजार २ सय १५ लिखत पारित भएका छन् ।
मलंगवा मालपोत सर्लाहीबाट १ हजार १९ लिखत पारित हुँदा धनगढी मालपोत कैलालीबाट ९ सय ७० र सिरहा मालपोतबाट ९ सय ६२ लिखत पारित भएको छ ।
राजस्व संकलनमा भने काठमाडौँ उपत्यकाका मालपोत अगाडि छन् । लगनखेल मालपोत ललितपुरबाट साउनमा ३४ करोड २७ लाख ४२ हजार राजस्व संकलन भएको छ ।
डिल्लीबजार मालपोतबाट २९ करोड ३९ लाख ६७ हजार राजस्व संकलन हुँदा भक्तपुर मालपोतबाट २३ करोड ३७ लाख २२ हजार, चाबहिल मालपोत काठमाडौंबाट २२ करोड ४२ लाख ७७ हजार र कलंकी मालपोत काठमाडौंबाट २२ करोड २७ लाख ८ हजार राजस्व संकलन भएको छ ।
