नेपालको कुल सार्वजनिक ऋण २८ खर्ब रुपैयाँ नाघेको छ । आर्थिक वर्ष २०८१/०८२ को अन्तिममा २६ खर्ब ७४ अर्ब ४ करोड रहेको सार्वजनिक ऋण चालु आर्थिक वर्ष २०८२/०८३ को ६ महिना (पौष मसान्तसम्म)मा बढेर २८ खर्ब ६ अर्ब ३९ करोड रुपैयाँ पुगेको हो ।
चालु आर्थिक वर्षको ६ महिनामै मुलुकको सार्वजनिक ऋण १ खर्ब ३२ अर्ब ३४ करोड रुपैयाँ थपिएको सार्वजनिक ऋण व्यवस्थापन कार्यालयले जनाएको छ । हालसम्म कायम रहेको सरकारी ऋण कूल गार्हस्थ्य उत्पादनको ४५.९५ प्रतिशत हो ।
कार्यालयका अनुसार कुल ऋणमध्ये वैदेशिक ऋणको हिस्सा ५३ प्रतिशत र आन्तरिक ऋणको हिस्सा ४७ प्रतिशत छ।
सरकारले चालु आर्थिक वर्षमा ५ खर्ब ९५ अर्ब सार्वजनिक ऋण उठाउने लक्ष्य राखेको छ ।
