निर्माण व्यवसायीहरुले सरकारले चालु आर्थिक वर्ष सकिँन लाग्दासमेत आफूहरुको ६० अर्ब भूक्तानी नदिएको गुनासो दोहोर्याएका छन् । निर्माण व्यवसायी महासंघले आज पत्रकार सम्मेलनको आयोजना गरेर चालु आर्थिक वर्ष समाप्त हुन चार दिन बाँकी रहँदा सरकारले निर्माण व्यवसायीहरुको ६० अर्ब रकम भुक्तानी दिन बाँकी रहेको जनाएको हो ।
महासंघले तत्काल निर्माण व्यवसायीहरुको भूक्तानी दिन समेत माग गरेको छ । महासंघका अध्यक्ष रवि सिंहका अनुसार सरकारबाट निर्माण व्यवसायीहरूको ६० अर्ब रकम भुक्तानी नहुँदा ‘आपूर्ति चक्र’ नै बिग्रिएको र निर्माण सामग्री उत्पादन गर्ने उद्योगहरु नै बन्द हुने स्थिति उत्पन्न भएको छ ।
“बैंकको किस्ता र अन्य कर तिर्न नसकी हजारौं व्यवसायी मात्र प्रताडित भएका छैनन्, उनीहरूमा आश्रित उद्योग तथा परिवारमा मनोवैज्ञानिक दवाब परेको छ” अध्यक्ष सिंहले भने ।
२०८१ असार मसान्तसम्ममा सबै रकम भुक्तानी नदिए बाध्य भएर आन्दोलन गर्नुपर्ने अवस्था सिर्जना हुने भन्दै महासंघले सांकेतिक चेतावनीसमेत दिएको छ । महासंघले विगतमा पनि आन्दोलनमा उत्रिएको स्मरण गराएको छ ।
