नेपाल उद्योग वाणिज्य महासंघभित्र विस्तारै चुनावी माहोल बन्न थालेको छ । आउँदो चैत २८ गते ६०औँ वार्षिक साधारणसभा तथा महाधिवेशन आयोजना हुने भएकाले वरिष्ठ उपाध्यक्ष र उपाध्यक्षका दाबेदारहरु क्रमश: खुल्न थालेका छन् ।
आउँदो साधारणसभाबाट हालका वरिष्ठ उपाध्यक्ष अन्जन श्रेष्ठ स्वत: अध्यक्ष बन्दैछन् । तर, संशोधित विधान अनुसार अब श्रेष्ठ पछिको कार्यकालबाट अध्यक्षमै चुनाव हुनेछ, अर्थात् हालको जस्तो वरिष्ठ उपाध्यक्ष नै अर्को कार्यकालका लागि स्वत: अध्यक्ष हुने प्रावधान हटाइएको छ । यसकारण महासंघको आउँदो साधारणसभा तथा महाधिवेशन फरक खालको हुने देखिन्छ ।
वरिष्ठ उपाध्यक्षमा ३ जना दाबेदार
महासंघको संशोधित विधान अनुसार अन्जन श्रेष्ठको कार्यकाल पछि वरिष्ठ उपाध्यक्ष अर्को कार्यकालका लागि स्वत: अध्यक्ष हुन पाउँदैन । यसकारण हालका उपाध्यक्षहरु कि सोही पदमा दोहोरिनुपर्यो, कि माथि जानुपर्यो । माथि जान अहिले नै अध्यक्षमा चुनाव हुँदैन । त्यसकारण धेरैको चाहना वरिष्ठ उपाध्यक्षमै जाने देखिएको छ ।
पदाधिकारी भइसकेका व्यक्तिहरु वरिष्ठ उपाध्यक्षमा चुनाव लड्न पाउने व्यवस्था संशोधित विधानमा गरिएको छ । साथै, ३ कार्यकाल केन्द्रीय सदस्य भएका व्यक्तिहरु पनि वरिष्ठ उपाध्यक्षमा चुनाव लड्न पाउने प्रावधान छ । यसकारण यसपाली वरिष्ठ उपाध्यक्ष केन्द्रीय सदस्यमध्येबाट चयन हुने सम्भावना कम छ । किनकी, बहालवाला पदाधिकारी र पूर्व पदाधिकारीहरु नै वरिष्ठ उपाध्यक्षका दाबेदार देखिएका छन् ।
वरिष्ठ उपाध्यक्षका आकांक्षीमध्ये हालका उपाध्यक्ष हेमराज ढकाल, उपाध्यक्ष सुरकृष्ण वैद्य र पूर्व उपाध्यक्ष (गत महाधिवेशनमा वरिष्ठ उपाध्यक्षमा पराजित भएका) रामचन्द्र सांघाईको नाम चर्चामा छ । ढकाललाई गत निर्वाचन लगत्तै आगामी कार्यकालका लागि वरिष्ठ उपाध्यक्षका उम्मेद्वारका रुपमा हेरिएको थियो ।
उपाध्यक्ष वैद्यले पनि आफू आगामी महाधिवेशनमा वरिष्ठ उपाध्यक्षमै प्रतिस्पर्धा गर्ने गरी तयारी अघि बढाएको बताएका छन् ।
सांघाईले पनि आन्तरिक छलफललाई तीव्रता दिएका छन् । गत महाधिवेशनमा सांघाई समूहबाट एसोसियट उपाध्यक्षमा निर्वाचित ज्योत्सना श्रेष्ठले पनि वरिष्ठ उपाध्यक्षमा दाबी गरिरहेको चर्चा छ । यद्यपी, हेमराज ढकाल, सुरकृष्ण वैद्य र रामचन्द्र सांघाईले आफूलाई वरिष्ठ उपाध्यक्षको उम्मेदवारका रुपमा प्रस्तुत गरिरहँदा ज्योत्सनाले भने मुख खोलेकी छैनन् ।
साथै, महासंघमा पदाधिकारी भइसकेका भाष्कर राजकर्णिकार र दिनेश श्रेष्ठलाई पनि वरिष्ठ उपाध्यक्षको आकांशीका रुपमा हेरिएको छ ।
एसोसियट उपाध्यक्षमा देशबन्धु र प्रबलजंग आकांक्षी
महासंघको सबैभन्दा बलियो क्षेत्र हो एसोसियट । हालसम्म महासंघको नेतृत्वमा पुग्नेहरुमध्ये अधिकांश एसोसियटबाटै प्रतिनिधित्व गरेकाहरु छन् । त्यसकारण महासंघमा एसोसियटलाई बलियो मानिन्छ ।
आउँदो महाधिवेशनमा एसोसियट उपाध्यक्षका लागि हालसम्म दुइ जनाको नाम चर्चामा छ । देशबन्धु बस्नेत (अजित) र प्रबलजंग पाण्डे । बस्नेत हाल महासंघको पर्यटन तथा हवाई यातायात समितिका सभापति हुन् भने पाण्डे स्थायी समिति सदस्य हुन् ।
बस्नेत हस्पिटालिटीसहित विभिन्न उद्यम व्यवसायमा क्रियाशील छन् । उनी गणतन्त्र जाम्बियाका अवैतनिक महावाणिज्यदूत पनि हुन् । सिमेन्ट तथा औषधी उद्योगसमेत सञ्चालन गरिरहेका पाण्डे भने हाल सिटिजन्स बैंकको अध्यक्ष छन् ।
साथै, एसोसियट उपाध्यक्षमा सैलेन्द्र गुरागाईँको पनि चर्चा सुरु भएको छ । यद्यपी, उनले बोलिसकेका छैनन् ।
वस्तुगत उपाध्यक्षमा घिमिरे र श्रेष्ठ भिड्ने चर्चा
महासंघको वस्तुगत उपाध्यक्षका लागि हालसम्म दुइ जनाको उम्मेदवारी करिब करिब पक्का भइसकेको छ । शिव घिमिरे र नरेशलाल श्रेष्ठ ।
श्रेष्ठ दुइ कार्यकाल वस्तुगत तर्फबाट केन्द्रीय सदस्यमा सबैभन्दा बढी मत ल्याएर निर्वाचित भएका थिए । हाल उनी महासंघको निर्यात प्रवद्र्धन समितिको सभापति छन् । निर्यातमूलक उद्यमसहित उनी हस्पिटालिटी र जलविद्युत क्षेत्रमा पनि सक्रिय छन् ।
अर्का प्रत्याशी घिमिरे पनि बलिया दाबेदार हुन् । एसजी ग्रुपका अध्यक्ष रहेका घिमिरे कत्था उत्पादक संघका अध्यक्ष पनि हुन् । पेट्रोल पम्प व्यवसायबाट सफलता हात पार्दै एलपी ग्याँस, हाइड्रोपावर, हस्पिटालिटि हुँदै बैंकिङ क्षेत्रमा समेत उनको लगानी छ ।
जिल्ला नगरमा ८ जना आकांक्षी
संशोधित विधान अनुसार अब महासंघमा जिल्ला नगर तर्फबाट २ जना उपाध्यक्ष निर्वाचित हुनेछन् । उम्मेदवारहरुमध्ये सबैभन्दा धेरै मत ल्याउने २ जना जिल्ला नगर उपाध्यक्षमा निर्वाचित हुने प्रावधान छ ।
२ जना निर्वाचित हुने जिल्ला नगर उपाध्यक्षका लागि हालसम्म ८ जनाको नाम चर्चामा छ । दिलसुन्दर श्रेष्ठ, कृष्ण प्रसाद शर्मा, पदम शाही, डी.बी. बस्नेत, राजेन्द्र राउत, उमेश डालमिया, कल्पना गैरे र कमल श्रेष्ठ जिल्ला नगर उपाध्यक्षका दाबेदार हुन् ।
दिलसुन्दर श्रेष्ठ हाल महासंघको बागमती प्रदेशका अध्यक्ष छन् भने कृष्ण प्रसाद शर्मा लुम्बिनी प्रदेशका अध्यक्ष हुन् । पदम शाही महासंघ कर्णाली प्रदेशको अध्यक्ष हुन् भने राजेन्द्र राउत महासंघको कोशी प्रदेशका अध्यक्ष हुन् ।
डि.बी. बस्नेत महासंघको कृषि उद्यम केन्द्रका सभापति हुन् भने उमेश डलमिया मेला समितिका सभापति छन् । कल्पना गैरे केन्द्रीय सदस्य छिन् । २ महिना अघि मात्रै केन्द्रीय सदस्य मनोनित भएका कमल श्रेष्ठ सिन्धुपाल्चोक उद्योग वाणिज्य संघका पूर्व अध्यक्ष हुन् ।
महिला उपाध्यक्ष: आकांशी खुल्न बाँकी
महासंघको नयाँ विधान अनुसार महिला उपाध्यक्षको पनि प्रावधान छ । यद्यपी, महिला उपाध्यक्षमा प्रत्यक्ष चुनाव भने हुँदैन । कार्यकारिणी समितिले महिला उापाध्यक्ष चयन गर्नेछ । यसका लागि केन्द्रीय कार्यकारिणी समितिमा कम्तीमा १२ जना महिला सदस्य हुनुपर्नेछ ।
तर, महिला उद्यमी महासंघ हालै मात्रै महासंघको वस्तुगत सदस्यबाट बाहिरएपछि महिला उपाध्यक्षका आकांक्षी खुल्न सकिरहेका छैनन् । तैपनि विधानले दिएको अधिकार उपयोग गर्नका लागि जसरी पनि केन्द्रीय कार्यकारिणी समितिमा १२ जना महिला पुर्याउने अभियानमा महिला उद्यमी तथा व्यवसायीहरु देखिएका छन् ।
