सरकारले विद्युत विकास विभागको महानिर्देशक परिवर्तन गरेको छ । ऊर्जा, जलस्रोत तथा सिँचाइ मन्त्री विराजभक्त श्रेष्ठले मन्त्रीस्तरीय निर्णय गर्दै विभागको महानिर्देशकको जिम्मा सागरराज गौतमलाई दिएका दिएका हुन् ।
उर्जा मन्त्रालयका सहसचिव गौतम यस अघि मन्त्रालयको विकास सहायता तथा प्रादेशिक समन्वय महाशाखा प्रमुख थिए। गौतम २०८० माघमा सहसचिवमा बढुवा भएका थिए । बिजनेशपानाले हिजो नै विद्युत विकास विभागको महानिर्देशक फेरिन लागेको र सागरराज गौतमको नाम सर्वाधिक चर्चामा रहेको समाचार प्रकाशन गरेको थियो ।
गौतम विद्युत नियमन आयोगको अध्यक्ष र सदस्य सिफारिस गर्न गठित समितिको सदस्य पनि थिए। विराज भक्त श्रेष्ठ मन्त्री भएपछि सहसचिव सागरराज गौतम कै नेतृत्वमा पेन्डिङ पीपीए तथा अनुमतिपत्र १८० दिनभित्र टुंग्याउने समिति गठन भएको थियो। सो समितिले विद्युत खरिद सम्झौता (पीपीए) गरी लामो समयसम्म शून्य प्रगतिमा रहेका १ हजार ३८८ मेगावाट क्षमताका ३८ वटा जलविद्युत आयोजनाको अनुमति रद्द गर्न सिफारिस गरेको थियो । उनी नेतृत्व कै समितिले लाईसेन्स रद्दसम्मको सिफारिस गरेको र सो कार्यान्वयन विभाग मार्फत हुने भएकोले त्यसको जिम्मा उनलाई नै दिन उपयुक्त हुने भएकोले पनि विभागमा मन्त्रीले गौतमलाई पठाएको बताईन्छ । मन्त्री श्रेष्ठ आएपछि गौतमले विभिन्न थप जिम्मेवारी पाएकोले पनि गौतमलाई मन्त्री श्रेष्ठको विश्वासपात्रको रुपमा हेरिएको छ ।
विभागको महानिर्देशक रहेकी मनदेवी श्रेष्ठ भने मन्त्रालय तानिएकी छिन्। उनी २०८२ असोजमा विभागको महानिर्देशक नियुक्त भएकी थिईन् । तत्कालीन ऊर्जा मन्त्री कुलमान घिसिङले श्रेष्ठलाई विभागको महानिर्देशकको रुपमा नियुक्त गरेका थिए। श्रेष्ठ विभागको पहिलो महिला महानिर्देशक समेत हुन् ।
