लालुपाते हाईड्रोपावर कम्पनीले निर्माण गर्ने ४९.९५ मेगावाट क्षमताको दाना खोला जलविद्युत आयोजनाको इलेक्ट्रो मेकानिकल कार्य भारतको फ्लोभेल ईनर्जीले गर्ने भएको छ । प्रबर्दक कम्पनी र फ्लोभेल ईनर्जीबीच बिहीबार सम्झौता भएको हो ।
लालुपाते हाइड्रोपावरका अध्यक्ष मोहन डाँगीका अनुसार आयोजनाको इलेक्ट्रो मेकानिकल कार्यका लागि २०८१ साल असोज २२ गते प्रस्ताव आह्वान गरिएको थियो, जसमा विभिन्न १० विदेशी कम्पनीले इच्छापत्र पेश गरेका थिए। ति कम्पनी मध्ये भारतको फ्लोभेल ईनर्जीको प्राविधिक र आर्थिक प्रस्ताव छनौट गरिएको हो । अबको २३ महिनामा कार्य सम्पन्न गर्ने गरि सम्झौता भएको अध्यक्ष डाँगीले जानकारी दिए।
यो आयोजना मनाङको नासो गाउँपालिकामा पर्छ । कम्पनीको आयोजनामा सानिमा बैंकको अगुवाइमा नबिल बैंक, सिटिजन्स बैंक, राष्ट्रिय वाणिज्य बैंक, कृषि विकास बैंक, नेपाल एसबिआई बैंक र हाइड्रो इलेक्ट्रिसिटी इन्भेस्टमेन्ट एन्ड डेभलपमेन्ट कम्पनी लिमिटेड (एचआइडिसिएल) ले ऋण लगानी गरेका छन् । आयोजनाको कुल लागत ९९६ करोड रुपैयाँ रहेको छ।
प्राधिकरणले आयोजनाको विद्युत हिउँदमा प्रतियुनिट ८.४० र वर्खामा ४.८० रुपैयाँमा खरिद गर्ने गरि सम्झौता भईसकेको छ। आयोजनाबाट उत्पादित विद्युत २ सय २० केभी प्रसारण लाइनमार्फत ३.५ किलोमिटरको दूरीमा रहेको प्राधिकरणको मनाङको धारापानी सबस्टेसनमा जोडिने छ । आयोजना निर्माण सम्पन्न गरि सक्नु पर्ने समय २०८४ कात्तिक २ गते तोकिएको छ ।
