चिलिमे जलविद्युत कम्पनी लिमिटेडले ४५ मेगावाटको चुमचेत स्यारखोला जलविद्युत आयोजना निर्माण गर्ने भएको छ । कम्पनीले आयोजना निर्माणको लागि अनुमतिपात्र माग गर्दै विद्युत विकास विभागमा आवेदन दिइसकेको छ ।
अब विद्युत विकास विभागले प्रस्तावित आयोजना निर्माण तथा सञ्चालन गर्दा आयोजना स्थलमा उल्लेखनीय प्रतिकूल असर पर्ने भएमा आफ्नो लिखित राय प्रतिक्रिया दिन आग्रह गर्दै आज भदौ ९ गते सार्वजनिक सूचना प्रकाशन गरेको छ । सूचना प्रथम पटक प्रकाशित भएको मितिले ३५ दिन भित्र विद्युत विकास विभाग वा उक्त कम्पनीको कार्यालयमा आफ्नो लिखित राय प्रतिक्रिया दिन आग्रह गरिएको छ।
कम्पनीले बनाउने यो आयोजना गोरखा जिल्लाको चुमनुब्री गाउँपालिका वडा नम्बर ५ र ६ मा रहने छ । कम्पनीका अनुसार आयोजनाको लागि चुमनुव्री गाउँपालिका-६ को गुमलुङ्गमा अवस्थित झोलुङ्गे पुल भन्दा ३०० मि. तल ८.५० मि. अग्लो र १५.५० मि. लम्बाइको Weir निर्माण गरी १३.८५ घनमिटर प्रति सेकेण्ड पानीको बहावलाई ग्रेभल ट्रेप हुदै बालुवा थिग्राउने पोखरीमा पुऱ्याई सफा पानीलाई ४९३२.३७ मि. लामो सुरुङ्ग मार्फत सर्ज शाफ्टमा पठाईने छ ।
तत्पश्चात् उक्त पानीलाई ७२५ मि. लामो २.० मि. आन्तरिक व्यास भएको प्रेसर शाफ्ट मार्फत चुमनुव्री गाउँपालिका-६ लोक्पा गाउँ नजिक निर्माण हुने भूमिगत विद्युतगृहमा खसाली पेल्टन टर्वाइनको सहायताले ४५ मे.वा. विद्युत उत्पादन गरिने छ । त्यसपछि निष्कासन हुने पानीलाई ३९० मि. लम्बाइ ३.६० मि. चौडाइ र ३.७५ मि. उचाइको टेलरेस सुरुङ्ग मार्फत पुनः स्यार खोलामा नै छोडिने कम्पनीले जनाएको छ । प्रस्तावित आयोजनाको सम्पूर्ण संरचनाहरु स्यार खोलाको दायाँ किनारमा अवस्थित रहने छन् ।
यस आयोजनाबाट उत्पादित विद्युतीय ऊर्जालाई २२० के.भी. सिङ्गल सर्किट विद्युत प्रसारण लाइन मार्फत बुढी गण्डकी प्रोक जलविद्युत आयोजनाको स्वीचिङ्ग स्टेशमा जोडिने छ । तत्पश्चात बुढी गण्डकी प्रोक जलविद्युत आयोजना, बुढी गण्डकी प्रोक-१ जलविद्युत आयोजना र चुमचेत स्यारखोला जलविद्युत आयोजनाबाट उत्पादित विद्युतीय ऊर्जालाई ७० किलोमिटर लामो एकिकृत २२० के.भी. डबल सर्किट विद्युत प्रसारण लाइन मार्फत लापाङ्ग बिहारथोकमा प्रस्तावित २२० / १३२/३३ के.भी. सवस्टेसनमा जोडी ने. वि. प्रा. को ग्रिडमा २२० के.भी. भोल्टेज लेभलमा Evacuate गर्ने योजना रहेको छ ।
आयोजनाको कुल लागत ९ अर्ब १५ करोड ३९ लाख अनुमान गरिएको छ ।
