नेपालका लागि चिनियाँ प्रिमियम इलेक्ट्रिक सवारी ब्रान्ड स्काईवेल/स्काईवर्थको आधिकारिक आयातकर्तामा एलआरआर मोटर्स नियुक्त भएको छ । यसअघि जी मोटर्ससँग रहेको आधिकारिक आयातकर्ताको अनुमति खारेज भएसँगै एलआरआर मोटर्स आधिकारिक आयातकर्ता बनेको हो ।
स्काईवेल ईभीको उत्पादक कम्पनी जियान्सु स्काईवेल अटोमोबाइल कम्पनी लिमिटेडले जी मोटर्ससँगको आधिकारिक बिक्रेता सम्झौता खारेज गरेर नेपालका लागि एलआरआर मोटर्सलाई आधिकारिक डिलरसीप प्रदान गरेको हो । एलआरआर मोटर्सले वाणिज्य विभागबाट एजेन्सी दर्तासमेत प्राप्त गरिसकेको छ ।
यसअघि जियान्सु स्काईवेल अटोमोबाइल कम्पनी लिमिटेडले २०२६ जुन ५ देखि लागू हुने गरी जी मोटर्सलाई आधिकारिक बिक्रेताबाट बर्खास्त गरेको थियो ।
स्काईवेलको आधिकारिक आयातकर्तामा नियुक्त भएसँगै एलआरआर मोटर्सले ‘सर्भिसमा फोकस’ गरिएको बताएको छ । यसअघि स्काईवेल ईभी खरिद गरेका ग्राहकहरुले सेवा नपाउने अवस्था आउन नदिन सुरुमा पार्टस् र सर्भिसमा फोकस गरिएको एलआरआर मोटर्सले जनाएको छ ।
यसअघि गाडी किनेका ग्राहकहरुले (जी मोटर्सबाट गाडी किनेका ग्राहकहरुले) सर्भिसको ग्यारेन्टी पाउने सुनिश्चितता गर्न गाडी भन्दा पहिले पार्टस् आयात गर्न लागिएको कम्पनीले जनाएको छ । ‘नयाँ गाडीभन्दा अगाडि पार्टस् ल्याउँदैछौँ, ताकी पूराना ग्राहकहरुले पनि सेवाको सुनिश्चितता प्राप्त गर्न सक्नुहोस्’ एलआरआर मोटर्सका अधिकारी भन्छन्, ‘गाडि चाहिँ नाडा अटो शोमा आउँछ ।’
कम्पनीले स्काईवेल बीई ११ लाई नाडा अटो शोमा सार्वजनिक गर्ने तयारी गरेको छ । जी मोटर्सले हाल बिक्री गरिरहेको मूल्यभन्दा सस्तो मूल्यमा गाडी लन्च गर्न सकिने एलआरआर मोटर्सले संकेत गरेको छ ।
