मिड–भ्याली इन्टरनेसनल कलेजले आयोजना गरेको दुईदिने ‘बिल्ड नेपाल ह्याकाथन २०२६ ’मा बढ्दो बाँदर आतंकबाट किसानका बाली जोगाउने प्रविधिमा आधारित समाधान प्रस्तुत गर्ने इनोभिजासमूह विजेता बनेको छ ।
‘बिल्ड टुडे, ट्रान्सफर्म टुमोरो’ नारासहित शनिबार र आइतबार काठमाडौंको मिड–भ्याली इन्टरनेसनल कलेजमा आयोजित ह्याकाथनमा सनवे कलेजका विद्यार्थी समृद्धि डुम्रे, ग्रिस्मा कार्की, प्राची मगर र प्रिन्स केसी सम्मिलित चार सदस्यीय ‘इनोभिजन’ समूहले ग्रान्ड प्राइज जित्दै ५० हजार रुपैयाँ पुरस्कार प्राप्त गरेको हो ।
ग्रामीण क्षेत्रमा पछिल्लो समय बढ्दै गएको बाँदर आतंकका कारण किसानले भोगिरहेको समस्या समाधान गर्ने उद्देश्यले समूहले प्रविधिमा आधारित समाधान प्रस्तुत गरेको थियो ।
त्यस्तै, यातायात क्षेत्रलाई डिजिटल प्रविधिमार्फत व्यवस्थित बनाउने अवधारणा प्रस्तुत गरेको मिड–भ्याली इन्टरनेसनल कलेजका विद्यार्थी सम्मिलित ‘सेन्टिनाज’ समूह रनरअप बनेको छ । शिशिर न्यौपाने, स्वीकृति तिमिल्सिना र आदित्य भण्डारी सम्मिलित समूहले २५ हजार रुपैयाँ पुरस्कार प्राप्त गरेको छ ।
मिड–भ्याली इन्टरनेसनल कलेजको आयोजनामा भएको ह्याकाथनमा २१ वटा बहुविषयगत टोलीमा विभाजित ६० भन्दा बढी युवाको सहभागिता थियो । १६ देखि २४ वर्ष उमेर समूहका सहभागीले एआई, इन्टरनेट अफ थिङ्स, रोबोटिक्स तथा क्लाउड प्रविधिको प्रयोग गर्दै नेपालका वास्तविक समस्या समाधानमा केन्द्रित कार्यात्मक नमुना तथा न्यूनतम व्यवहार्य उत्पादन तयार गरेका थिए ।
ह्याकाथनमा स्मार्ट सिटी, स्मार्ट कृषि, शिक्षा तथा सिकाइ, पर्यटन तथा सम्पदा, साइबर सुरक्षा र डिजिटल अर्थतन्त्र गरी छवटा विषयगत क्षेत्रमा नवीन समाधान विकास गर्न सहभागी टोलीबीच प्रतिस्पर्धा भएको थियो ।
मिड–भ्याली इन्टरनेसनल कलेजकी प्रबन्ध निर्देशक रीतल राणाले ह्याकाथनमा सहभागी सबै विद्यार्थीलाई धन्यवाद दिँदै पछिल्लो समय नयाँ–नयाँ प्रविधिको प्रयोग तीव्र रूपमा बढिरहेको बताइन् । उनले विद्यार्थीमा नयाँ विचार भए पनि त्यसलाई प्रस्तुत गर्न नसक्दा त्यसको प्रभाव सीमित हुने भन्दै यस्ता कार्यक्रममार्फत आफ्ना विचार र सिर्जनशीलता सार्वजनिक गर्नुपर्ने बताएकी छिन् ।
