प्रा.डा.गोपिलाल न्यौपानेले निःशुल्क सार्वजनिक शिक्षा पद्धतिलाई खारेज गरेर नीजि तथा प्रतिस्पर्धात्मक व्यवस्था अवलम्बन गर्नुपर्ने बताएका छन् । शुक्रबार राजधानीमा आयोजित ‘निःशुल्क सार्वजनिक शिक्षाका समस्या र शिक्षामा निजीकरण’ विषयक अन्तरसंवाद कार्यक्रममा न्यौपानेले यही शिक्षा प्रणाली अघि बढीरहे देश सामुदायिक विद्यालयहरु गाई वस्तुका खोरमा परिणत हुने चेतावनीसमेत दिए ।
न्यौपानेले नेपाली शिक्षा २०२८ सालदेखि गलत प्रणालीमा हिडिरहेको र त्यसैको परिणाम स्वरुप आजको अवस्थासम्म आइपुग्दा बेरोजगार उत्पादन गर्ने कारखानामा परिणत भएको पनि बताए । सोही प्रणालीका कारण पनि देशमा दुई शिक्षा प्रणालीको आवस्था आएको बताउँदै न्यौपानले अब राज्यले सबै विद्यालयलाई प्रतिस्पर्धात्मक बनाउन जरुरी रहेको बताए ।
‘राज्यमा सामुदायिक र निजी विद्यालयहरु फरकफरक किन ? सामुदायिकभन्दा निजीमा राम्रो कसरी कसैले सोचेको छ ? यसैले बेलैमा राज्यले सबै विद्यालयलाई प्रतिस्पर्धात्मक बनाउन जरुरी छ’ उनले भने ।
निजी विद्यालयहरु महँगा भए भन्ने भाष्य गलत भएको पनि उनको दाबी छ । समुदायिक विद्यालयमा सरकारले वार्षिक २ खर्बका दरले एकजना विद्यार्थी बराबर ५० हजार खर्च गर्दा पनि उत्तीर्ण दर ५० प्रतिशत पनि नरहेको बताउँदै न्यौपानले निजीमा भने वार्षिक प्रति विद्यार्थी २०–२५ हजार खर्च गर्ने स्कूल पनि रहेको र उनीहरुले सतप्रतिशत रिजल्ट निकाल्ने बताए ।
यसकारण पनि निःशुल्क सार्वजनिक शिक्षालाई खारेज गरेर गर्नुपर्ने उनको सुझाव छ । सरकारले हाल एक जना विद्यार्थी बराबर गरिरहेको खर्च सिँर्ध विद्यार्थीलाई दिने र यसो गरिँदा प्रतिस्पर्धात्मक प्रणालीमार्फत सरकारी लगानी बालुवामा पानी हुनबाट जोगिने न्यौपानेको दाबी छ ।
