बुधबार बिहान भएको सौर्य एयरलाइन्स जहाज दुर्घटनाबारे संसदीय समितिले उठाएको प्रश्नमा नियामक निकाय नेपाल नागरिक उड्डययन प्राधिकरणका महानिर्देशक प्रदीप अधिकार ‘बोल्न नमिल्ने’ भन्दै पन्छिएका छन् । ‘सी चेक’का लागि उडेको जहाजमा असम्बन्धित व्यक्तिहरु सवार भएको विषयमा संसदीय समितिमा सांसदहरुले उठाएको प्रश्नमा महानिर्देशक अधिकारीले बोल्न नमिल्ने जवाफ फर्काएका हुन् ।
बिहीबार संघीय संसदको अन्तर्राष्ट्रिय सम्बन्ध तथा पर्यटन समितिको बैठकमा समितिका सभापति राजकिशोर यादवले सौर्य एयरको विमान दुर्घटनामा इन्जिनियर, प्राविधि बाहेकका असम्बन्धित व्यक्ति र बच्चासमेत परेको भन्दै महानिर्देशक अधिकारीलाई ‘सी चेक’का लागि उडेको जहाजले असम्बन्धित व्यक्तिहरु किन बोक्यो भन्दै प्रश्न गरेका थिए ।
तर, नागरिक उड्डयन प्राधिकरणका महानिर्देशक प्रदीप अधिकारी भने बोल्न नमिल्ने भन्दै पन्छिए ।
‘घटना घटिसकेको छ, सरकारले यसबारे छानबिन आयोग गठन गरिसकेको छ, अहिले हामी सबै अनुसन्धानको दायरामा छौँ,’ उनले भने, ‘आयोगले सत्य तथ्य छानबिन गर्ला । यस विषयमा मैले बोल्न उचित हुँदैन ।’
बुधबार काठमाडौँबाट पोखरा उडेको सौर्य एयरलाइन्सको जहाज दुर्घटना हुँदा १८ जनाको मृत्यु भएको छ ।
