बुधबार बिहान ११ बजेको समयमा काठमाडौँस्थित त्रिभुवन अन्तर्राष्ट्रिय विमानस्थलमा सौर्य एयरलाइन्सको जहाज दुर्घटनाग्रस्त हुँदा १८ जनाले ज्यान गुमाए। उक्त जहाज दुर्घटना हुँदा एयर डाइनेष्टीका कर्मचारीहरु ‘भाग्यले बाँचे’ । किनकी, सौर्यको जहाज डाइनेष्टीको कन्टेनरमा बजारियो र जहाजसँगै उक्त कन्टेनर पनि ध्वस्त भयो ।
कन्टेनरमा एयर डाइनेष्टीको कार्यालयसहित अन्य उपकरणहरु थिए । त्यहाँका कर्मचारीहरु सौर्यको जहाज दुर्घटना हुँदा सिम्रिक एयरको कन्टेनरमा थिए । सिम्रिक एयरको कन्टेनर अगाडी पनि दुर्घटनाग्रस्त जहाजको एउटा ढोका खस्यो ।
हेलिकप्टरहरुलाई नलिञ्चोक हेलिप्याडमा सारेपछि काठमाडौँ एयरपोर्टमा भएका हेलिकप्टरका कार्यालयहरु पनि बेवारिसे बनेका छन् । नलिञ्चोक हेलिप्याडमा कार्यालय राख्न कुनै ठाउँ नै छैन । फलतः पेप्सीकोला पट्टिको खाली ठाउँमा कन्टेनरभित्रै कार्यालय र उपकरणहरु राख्न बाध्य पारियो । जसले जोखिम निम्त्याएको छ । उता, बिना कुनै पूर्वाधार नलिन्चोक हेलिप्याड सञ्चालनमा ल्याइएपछि जुनसुकै बेला हिजो काठमाडौँमा भए जस्तै दुर्घटना हुन सक्ने जोखिम पाइलटहरुले औल्याउँदै आएका छन् ।
सँगै, काठमाडौँ विमानस्थलमा भएका ‘ह्याङ्गर’हरु हटाएका कारण सौर्यको जहाज ‘कम्प्लिट चेक’ (सी चेक)का लागि पोखरा जानुपर्ने बाध्यता आइलाग्यो । त्रिभुवन अन्तर्राष्ट्रिय विमानस्थलको विस्तार गर्ने भन्दै त्यहाँ भएका श्री र यती एयरलाइन्सको ‘ह्याङ्गर’ हटाइएको छ । बुद्ध एयर र नेपाली सेनाको ह्याङ्गर बाँकी छ ।
अन्य एयरलाइन्सहरुले बुद्ध एयरकै ह्याङ्गरमा निश्चित शुल्क तिरेर जहाज परीक्षण गराउँथे । तर, स्रोतका अनुसार नेपाल नागरिक उड्डययन प्राधिकरण (क्यान)ले बुद्धले ह्याङ्गर प्रयोग गर्न दिएबापत लिने शुल्कमा कर तिर्नुपर्ने ब्यवस्था गरिदियो । अर्थात् बुद्धले ह्याङ्गर भाडामा दिएर गरेको आम्दानीमा प्राधिकरणले हिस्सा खोज्यो । यसपछि नोक्सान हुने देखेर बुद्धले ह्याङ्गर भाडामा दिन छोड्यो । उसले आफूसँग १८ वटा जहाज भएकाले आफ्नै जहाजको परीक्षण र मर्मत गर्नुपर्ने भन्दै अन्य एयरलाइन्सलाई ह्याङ्गर दिन बन्द गरिदियो ।
‘हामीसँग आफ्नै जहाज १८ वटा छन्, अरुलाई ह्याङ्गर भाडामा दिँदा आफ्नै जहाज मर्मत र परीक्षणमा बिलम्ब हुन सक्ने देखिएकाले दिन छोडेका हौँ’ बुद्ध एयरका प्रवक्ता दीपेन्द्र कुमार कर्णले बिजनेश पानासँग भने ।
काठमाडौँमा ह्याङ्गर नपाएरै सौर्यको जहाज परीक्षणका लागि पोखरा जानु परेको उड्डययन क्षेत्रका जानकारहरुको दाबी छ । पोखरा अन्तर्राष्ट्रिय विमानस्थलमा क्यान (अन्तर्राष्ट्रिय एयरपोर्टमा ह्याङ्गर हुनुपर्ने मापदण्ड छ)को ह्याङ्गर छ । क्यानले पोखरा एयरपोर्टको आम्दानी देखाउन एयरलाइन्सहरुलाई जहाजको ‘सी चेक’का लागि पोखरा पठाउने गरेको एक जना जानकारले बताए । त्यहीँ शिलशिलामा बुधबार सौर्यको जहाज पनि पोखरा उड्ने क्रममा काठमाडौँ विमानस्थलको हाताभित्रै भयानक दुर्घटनामा परेको ति जानकारको दाबी छ ।
