प्रधानमन्त्री सुशीला कार्कीले नेपाल वायुसेवा निगम (नेपाल एयरलाइन्स)मा मनलाग्दी र कुनै प्रक्रिया बिना भर्ती गरिएका करारका कर्मचारी तत्काल हटाउन निर्देशन दिएकी छन् । नागरिक उड्डयन तथा पर्यटनमन्त्रीको समेत जिम्मेवारी सम्हालिरहेकी प्रधानमन्त्री कार्कीले निगमको सञ्चालक समिति र व्यवस्थापनका उच्च पदस्थ अधिकारीहरूलाई सिंहदरबार बोलाएर पहुँचका आधारमा भर्ती गरिएका करारका कर्मचारी हटाउन निर्देशन दिएकी हुन् ।
‘नातावाद, कृपावाद, विभेद अन्त्यका लागि यता यत्रो आन्दोलन भइरहेको बेलामा पनि भटाभट आफ्ना मान्छे भर्ती गरेको छ, अवकाश भएर घर जान लाग्दा पनि मनपरी गर्न छाडिएको छैन’ प्रधानमन्त्री कार्कीले भनिन्, ‘यो बेथिति तुरुन्त रोक्नुहोस् ।’ यसअघि निगमको कार्यकारी अध्यक्षबाट अवकाश भएका युवराज अधिकारीले जाँदाजाँदै ४५ जना कर्मचारीलाई विना प्रक्रिया भर्ती गरेका थिए । उनले आफ्नो कार्यकालमा २ सयभन्दा बढी कार्यकर्तालाई निगमको करार कर्मचारीका रुपमा भर्ती गरेका थिए ।
उक्त भेटघाटमा निगमका निमित्त महाप्रबन्धक जनकराज कालाखेतीले निगम १७ अर्ब रुपैयाँभन्दा बढीको सञ्चित नोक्सानीमा रहेको जानकारी गराएका थिए ।
प्रधानमन्त्री कार्कीले निगमको जहाजको इन्जिन मर्मत गर्न पठाएर नल्याएको र भाडाको इन्जिन पनि पैसा नतिरी चलाएर ठूलो खर्च अहिले दाबी परेको विषयमा पनि चासो राखेकी थिइन् ।
भेटमा अर्थमन्त्री रामेश्वर खनाल, मुख्यसचिव एकनारायण अर्याल पनि सहभागी थिए ।
