नाडा अटोमोबाइल्स एसोसियशन अफ नेपालले विद्युतीय सवारीको भन्सार दर घटाउन र अन्तःशुल्क शून्यमा झार्न सुझाव दिएको छ । आगामी आर्थिक वर्षको बजेटमा सुझाव पठाउँदै नाडाले अधिकतम् ५० किलोवाटसम्मका ईभीमा भन्सार दर घटाएर अन्तःशुल्क शून्यमा झार्न सुझाव दिएको हो ।
हाल ५० किलोवाट सम्मका ईभीमा १५ प्रतिशत भन्सार शुल्क र ५ प्रतिशत अन्तःशुल्क लाग्दै आएकोमा नाडाले अब ५० किलोवाट सम्मका ईभीमा ५ प्रतिशत भन्सार मात्रै लिन माग गरेको छ । यस्तै, ५० किलोवाटदेखि माथि १०० किलोवाट सम्मका ईभीमा हाल २० प्रतिशत भन्सार र १५ प्रतिशत अन्तःशुल्क लाग्दै आएकोमा अब १० प्रतिशत भन्सार मात्रै लिएर अन्तःशुल्क शून्य गर्न माग गरेको छ ।
‘विद्युतीय सवारी साधनमा लाग्ने भन्सार घटाउनाले ती सवारी साधनहरू अझ किफायती हुनेछन्, प्रयोगमा ल्याउने क्षमता बढ्नेछ, जीवाश्म इन्धनमा निर्भरता घट्नेछ र स्वच्छ वातावरणलाई प्रवद्र्धन गर्नेछ’ नाडाले भनेको छ ।
१ सय किलोवाट भन्दा माथि क्षमताका ईभीका विषयमा भने नाडाले कुनै सुझाव दिएको छैन ।
