हिमालयन मोट्रक्स प्रा.लि.ले म्याक्सस ब्राण्डको इलेक्ट्रीक पीकअप नेपाल भित्र्याएको छ । कम्पनीले लग्जरी र प्रिमियम भेरियन्टमा ‘एटेरेन–९’ पीकअप ईभी नेपाल ल्याएको हो ।
नेपाल आएको म्याक्ससको इलेक्ट्रीक पीकअपमा सेग्मेन्टकै ठूलो साइजको ब्याट्री प्याक छ । डब्लूएलटीपीले प्रमाणित गरे अनुसार १०२ किलोवाट आवर क्षमताको ब्याट्री भएको यस पीकअपले एकपटकको फुल चार्जमा ४३० किलोमिटरसम्म रेन्ज दिनेछ ।
म्याक्ससको एटेरन–९ मा २६० एमएम ग्राउण्ड क्लियरेन्स छ । मुख्य भनेको यो पीकअपमा एयर सस्पेन्सन पनि छ । सिटी एरियामा चलाउँदा २३० एमएम ग्राउण्ड क्लियरेन्स राखेर पनि चलाउन सकिने छ ।
फोर ह्वील ड्राइभ अप्सनमा आएको यस पीकअपको अगाडि १२५ र रियरमा २०० किलोवाटको मोटर छ । दुवै मोटरको संयुक्त पावर भने ३२५ किलोवाट रहेको छ ।
अटोमेटिक एयर कण्डिसन, हिटेड स्टेरिङ ह्वील, इलेक्ट्रीक एड्जस्टेबल फ्रन्ट सिट, लेदरेट सिट कभर, हिटेड र भेन्टीलेटेड फ्रन्ट एण्ड रियर सिट, मसाज ड्राइभिङ जस्ता विशेषता भएको यो गाडीमा पानारोमिक सनरुफ लगायतका फिचर्स पनि छन् ।
फ्रन्ट तथा रियर पार्किङ सेन्सर, अटोमेटिक इमर्जेन्सी ब्रेकिङ, फर्वाड कोलुजन वार्निङ, लेन डिपार्चर वार्निङ, रियर क्रस ट्राफिक अलर्ट, ७ वटा एयरब्याग, जस्ता फिचर्सले भरिपूर्ण यस एटेरन–९ ले युरो एनक्याप क्रयास टेक्टमा ५ स्टार रेटिङ पाएको छ ।
कम्पनीले २ लाख किलोमिटर र ८ वर्षको वारेन्टी दिएको छ । सामान्यतया, १ लाख ५० हजार किलोमिटरको मात्रै वारेन्टी दिइने गरिएपनि हिमालयन मोट्रक्सले भने २ लाख किलोमिटरको वारेन्टी दिएको छ । साथै, मोटरमा पनि ५ वर्ष वा १ लाख २० हजार किलोमिटरको वारेन्टी दिइएको छ ।
मे १४ मा औपचारिक लन्च गर्ने तयारी गरिएको म्याक्सस ‘एटेरेन–९’को अहिले धमाधम बुकिङ भइरहेको छ । अहिले नेपाली बजारमा कम्पनीले ९९ लाख ९९ हजारमा बुकिङ लिइरहेको छ । काठमाडौँ र पोखरामा टेस्ट ड्राइभ पनि सुरु भएको छ । कम्पनीका अनुसार चितवनमा पनि गाडी पठाउने तयारी भइरहेको छ । सुरुमा कम्पनीले ६ युनिट गाडी नेपाल ल्याएकोमा सबै शहरमा पुर्याएर टेस्ट ड्राइभ गराउने लक्ष्य लिएको छ ।
कम्पनीले अहिले काठमाडौँमा थापाथलीबाट अफिसियल काम गर्दै आएको छ । निकट भविष्यमा उत्तरढोकामा शोरुम सञ्चालनमा ल्याउन तयारी अघि बढाएको छ ।
