वाणिज्य, आपूर्ति तथा उपभोक्ता संरक्षण विभागले एमएडब्ल्यू वृद्धि मोटर्समा छापा हानेको छ । विद्युतीय सवारी (ईभी गाडी)को आयातकर्ता कम्पनी एमएडब्ल्यू वृद्धिले गाडी आयात गर्दा ९९ किलोवाट क्षमताको मोटर पावरको आधिकारिक डकुमेन्ट बुझाउन नसकेको भन्दै विभागले छापा मारेको हो ।
विभागले ९९ किलोवाट क्षमताको पुष्टि हुने कागजात र खुद्रा मूल्य नखुलाएको भन्दै छापा हानेको जनाएको छ । उक्त कम्पनीलाई चैत २० गते पत्र पठाउँदै विभागले बिक्री वितरण रोक्का गरिदिएको छ ।
विभागका अनुसार एमएडब्ल्यू वृद्धि मोटर्स (काठमाडौं–११) र एमएडब्ल्यू वृद्धि अटोकर्प प्रा.लि. (काठमाडौं–११) लाई बिक्री वितरण रोकेर आवश्यक कागजात बुझाउन निर्देशन दिइएको छ ।
विभागका महानिर्देशक कुमार दाहालले पटक–पटक राख्न निर्देशन दिँदा पनि कम्पनीले खुद्रा मूल्यसूची उपलब्ध नगराएपछि बिक्री नै रोक्नु परेको बताएका छन् ।
एमएडब्ल्यू वृद्धिले नेपालमा दिपल, सेरेस र नामी ब्रान्डका ईभी गाडी आयात र बिक्री गर्दै आएको छ ।
