पाँचौं राष्ट्रिय श्रम तथा रोजगार सम्मेलनको अवसरमा नाडा अटोमोबाइल्स एसोसियशन अफ नेपाल र श्रम मन्त्रालय अन्तर्गतको सामाजिक सुरक्षा कोषबीच समझदारी पत्रमा हस्ताक्षर भएको छ ।
नाडा र सामाजिक सुरक्षा कोषबीच नाडामा आवद्ध संघ संस्था र प्रतिष्ठानहरुमा कार्यरत श्रमिकहरुलाई सामाजिक सुरक्षा कोषमा आवद्ध गराउने र कोषले सामाजिक सुरक्षा योजनाहरु र सुविधाहरुका सम्बन्धमा नाडासँगको सहकार्यमा सचेतना कार्यक्रम सञ्चालन गर्ने सम्बन्धि सम्झौता भएको हो । उक्त सझदारीपत्रमा समझदारी पत्रमा नाडाकातर्फबाट अध्यक्ष करण चौधरी र कोषकोतर्फबाट कार्यकारी निर्देशक कविराज अधिकारीले हस्ताक्षर गरेका छन् ।
समझदारी अनुसार अब नाडामा आवद्ध संघ संस्था र प्रतिष्ठानहरुले आफ्ना श्रमिकहरुलाई श्रम ऐन २०७४ तथा योगदानमा आधारित सामाजिक सुरक्षा ऐन २०७४ बमोजिम सामाजिक सुरक्षा कोषमा आवद्ध गराउने छन् । साथै, नाडाले हरेक प्रदेशमा सञ्चालन गर्ने भन्सार, भ्याट र भिसिटियस सम्बन्धी प्रशिक्षण कार्यक्रमहरुमा सो कोषबाट समेत प्रशिक्षक उपलब्ध हुनेछन् ।
समझदारी पत्रमा हस्ताक्षर कार्यक्रममा श्रम, रोजगार तथा सामाजिक सुरक्षामन्त्री शरतसिंह भण्डारी पनि उपस्थित थिए ।नाडाकातर्फबाट महासचिव सुरेन्द्रकुमार उपे्रती र सचिव विक्रम सिंहानिया समेतको उपस्थिति रहेको थियो ।
