नेपालमा एजमी गाडीको आधिकारिक बिक्रेता पारामाउण्ट मोटर्सले एमजीको बहुप्रतिक्षित विद्युतिय एसयुभी एस–५ नेपाल भित्र्याउँदैछ । कम्पनीका अनुसार एस–५ भन्सार नाकामा आइपुगेको छ भने अर्को हप्तासम्म शोरुममा आइपुग्नेछ ।
शोरुममा गाडी आइपुग्नासाथ बुकिङ खुलाउने कम्पनीका प्रतिनिधिले जानकारी दिएका छन् ।
ईभी एस–५ यसअघि निकै चर्चित बनेको एमजी जेडएसको फेसलिफ्ट भर्सन रहेको बताइएको छ । एस–५ लाई उत्पादकले ‘प्योर इलेक्ट्रिक प्लेटफर्म’मा तयार पारेको छ ।
विश्व बजारमा बजारमा ४९ र ६२ किलोवाट आवर ब्याट्री प्याकमा उपलब्ध एस–५ को दूबै भेरिएन्ट नेपाल आउने देखिएको छ । अन्तर्राष्ट्रि अटो साइटहरुमा उल्लेख भए अनुसार यस कारको रेन्ज क्रमश ४२५ र ५२० किलोमिटर दाबी गरिएको छ ।
एस–५ मा लिथियम आइरन फस्फेट ब्याट्री दिएको हो । यसको मोटर क्षमता भने १२५ किलोवाट छ । ७.२ किलोवाट क्षमताको चार्जरले यसलाई ८ घण्टामै फुल चार्ज गर्न सकिने बताइएको छ ।
नेपाली बजारमा यसको मूल्य कति पर्छ भन्ने सार्वजनिक भइसकेको छैन । यद्यपी, चिनियाँ बजारमा १४ देखी २० हजार डलरसम्म बिक्री भइरहेको छ ।
४ हजार ४७६ एमएम लामो, १ हजार ८४९ एमएम चौडा र १ हजार ६२१ एमएम अग्लो एस–५ मा २ हजार ७३० एमएम लामो ह्विलवेश दिइएको छ । सँगै, पानारोमि सनरुफ, १८ इन्चको मल्टि स्पोक एलोई ह्विल, भेन्टिलेसन सहितको लेदर सिट, १५.६ इन्चको टचस्क्रिन इन्फोटेन्मेन्ट सिस्टम, १०.२५ इन्चको इन्स्ट्रयुमेन्ट क्लस्टर, वायरलेस मोबाइल चार्जिङ, एडप्टिभ क्रुज कन्ट्रोल र ३६० डिग्री क्यामेरा लगायतका विशेषताले गाडीलाई आकर्षक बनाएको बताइन्छ ।
