बीवाईडीले बहुप्रतीक्षित मल्टि पर्पोज भेहिकाल (एमपीभी) बीवाईडी एम६ सार्वजनिक गरेको छ । पोखरामा आयोजित अन्तर्राष्ट्रिय बेलुन महोत्सवमा साइमेक्स इंकले ७ सिट क्षमताको एम६ ईभी सार्वजनिक गरेको हो ।
यो गाडी पारिवारिक र व्यापारिक दुवै प्रयोजनका लागि उपयुक्त हुने बीवाईडीको नेपालका लागि आधिकारिक वितरक साइमेक्स इंकले जनाएको छ । साइमेक्स इंककी प्रबन्ध निर्देशक यमुना श्रेष्ठले नेपालको प्रमुख प्रयटकीय शहर पोखरामा उक्त गाडी सार्वजनिक गर्न पाएकोमा खुशी व्यक्त गर्दै यो गाडी सबै ग्राहकका लागि उत्कृष्ट रोजाइ हुने विश्वास व्यक्त गरिन् ।
साइमेक्स इंकका सीईओ साहिल श्रेष्ठले बीवाईडीले दिगो र गुणस्तरमा विश्वास गर्ने बताउँदै बीवाईडीका ईभी गाडीले ७७ अर्ब किलो कार्बनडाइअक्साइदको उत्सर्जन रोकेको बताए ।
बीवाईडीको प्रयोजनमा पोखरामा बेलुन फेस्टिवल सुरु भएको छ ।
एम६ गाडीले नेपालमा नयाँ बेञ्चमार्क सेट गर्ने र यो सबैभन्दा कमफरटेबल ७ सिटर गाडी भएको साइमेक्सले बताएको छ ।
यस्ता छन् फिचर
बीवाईडीको विद्युतीय एमपीभी एम६ मा ७१.८ किलोवाट आवरको ब्याट्री छ । गाडीले डब्लूएलटीपीका आधारमा ४४० किलोमिटर रेन्ज दिने बताइएको छ। एम६ मा १०० किलोवाट हाई–पर्फमेन्स इलेक्ट्रिक मोटर छ भने गाडीको टर्क २५० एनएम छ ।
कम्फर्ट, परफर्मेन्स र सस्टेनेबिलिटी प्रदान गर्ने तरिकाले डिजाइन गरिएको बीवाईडी एम६ को प्रारम्भिक मूल्य ५८ लाख ९० हजार रुपैयाँ तोकिएको छ । कम्पनीले यो एमपीभी (मल्टी युटिलिटी भेइकल) नेपाली परिवार र व्यापारिक घरानाको चाहना पुरा गर्ने गरी लक्जरी, फङ्सनालिटी र सस्टेनेबिलिटीका आधारमा डिजाइन गरिएको बताइएको छ ।
गाडीमा ७ वटा प्रिमियम सिट, प्यानोरामिक ग्लास रुफ र ५८० लिटर सम्मको फ्लेक्जिबल लगेज क्षमता छ । ११५ किलोवाटको फास्ट चार्जिङ सपोर्ट गर्ने गाडीलाई ३७.४ मिनेटमै फुल चार्ज गर्न सकिने कम्पनीको दाबी छ ।
गाडीमा ६ एयरब्याग, एडेप्टिभ क्रुज कन्ट्रोल, लेन किपिङ असिस्ट र पार्किङ सेन्सर जस्ता एड्भान्स्ड सेफ्टी फिचर छन् । १२.८ इन्चको रोटेटेबल इन्फोटेनमेन्ट डिस्प्ले, वायरलेस फोन चार्जिङ र बीवाईडीको लेभल २ एडास टेक्नोलोजी लगायतका नयाँ स्तरीय प्रविधि पनि यो एमपीभीमा छन् । बीवाईडी एम६ एमपीभीको मोटर र ब्याट्रीमा ८ वर्ष वा १ लाख ६० हजार किलोमिटरसम्मको वारेन्टी रहेको छ।
