राष्ट्रिय सहकारी नियमन प्राधिकरणले बचत तथा ऋण सहकारीलाई प्राधिकरणमा अनिवार्य दर्ता गर्नुपर्ने व्यवस्था गर्ने भएको छ । प्राधिकरणले भदौदेखि बचत तथा ऋणको मुख्य कारोबार गर्ने सहकारी संस्थालाई प्राधिकरणमा दर्ता गराउन थालिने बताएको हो ।
के कसरी दर्ता गराउने भन्ने मापदण्ड बनाइसकिएको र अब उक्त मापदण्ड कार्यान्वयनको चरणमा रहेको प्राधिकरणका कार्यकारी निर्देशक शेषनारायण पौडेलले जानकारी दिए । उनका अनुसार बचत तथा ऋणको मुख्य कारोबार गर्ने सहकारी संस्थाको दर्ता मापदण्ड, २०८२ तर्जुमा भइसकेको छ । अब सहकारी दर्ता गर्न छुट्टै दर्ता सफ्टवेयरको निर्माण गर्ने तयारी भइरहेको छ ।
साथै, प्राधिकरणले सहकारी संस्थाहरूको नियमन तथा सुपरिवेक्षण कार्यविधि तयार गरी समस्या उन्मुख सहकारी संस्थाहरूलाई स्थलगत र अन्य सहकारी संघसंस्थाहरूलाई गैर स्थलगत नियमन सुरु गर्ने तयारी पनि अघि बढाएको छ ।
