कास्कीको पोखरामा रहेको प्राइम बहुउद्देश्यीय सहकारी संस्थाको रकम हिनामिना अभियोगमा सात जना जेल चलान भएका छन् । कास्कीको पोखरा महानगरपालिका वडा नम्बर ४, ग्रैह्रपाटनमा रहेको प्राइम बहुउद्देश्यीय सहकारी संस्थाको रकम अपचलन मुद्दामा उनीहरु जेल चलान भएका हुन् ।
कास्की जिल्ला अदालतका न्यायाधीश रामचन्द्र शर्माको इजलासले बिहीबार उनीहरूलाई पुर्पक्षका लागि थुनामा पठाउने आदेश दिएको हो । अदालतले सहकारीका प्रमुख कार्यकारी अधिकृत सुरेन्द्रमणि पौडेल, निवर्तमान अध्यक्ष निदेशप्रसाद कोइराला, अध्यक्ष शङ्कर कार्की, व्यवस्थापक निरु थापा, पूर्व कोषाध्यक्ष कुल दीप भट्टराई, कर्जा अधिकृत सुनिल थापा र उत्तम मगरलाई थुनामा पठाउने आदेश दिएको हो ।
सहकारीका शेयर सदस्य एवं सल्लाहकार मानबहादुर गुरुङसँग ३५ लाख र राष्ट्रिय सहकारी बैङ्कका पूर्व कर्मचारी सन्तोष घिमिरेसँग एक लाख धरौटी लिएर रिहा गर्न अदालतले आदेश दिएको छ ।
प्राइमको ठगी प्रकरणमा आठ जना सरकारी कर्मचारी, केही लेखा परीक्षक, पूर्व अध्यक्ष, प्रदेश सरकारका सचिव, सहकारी रजिस्ट्रारसमेत मुछिएका छन् । यस प्रकरणमा ६५ जना प्रतिवादी बनाई प्रहरीले मुद्दा दर्ता गरेको थियो। प्रहरीले प्रतिवादीहरुलाई आठ देखि १० वर्षसम्म कैद सजाय तथा एक अर्ब ५७ करोड १५ लाख आठ हजार एक सय २४ रुपैयाँ बिगो माग दाबीसहित आरोप पत्र दर्ता गरेको थियो । यस मुद्दामा ५६ जना अझै फरार छन् ।
