नवनियुक्त गभर्नर डा. विश्वनाथ पौडेलले डा. गुणाकर भट्टलाई कार्यालय फर्काएका छन् । राजीनामा दिएर बसेका भट्टलाई नवनियुक्त गभर्नर डा. पौडेलले आर्थिक अनुसन्धान विभागबाट गभर्नरको कार्यालयमा सरुवा गरेका छन् ।
राजीनामा दिएपनि उनको स्वीकृत हुन बाँकी थियो । उनी राष्ट्र बैंक फर्किन्छन् कि फर्किदैनन् भन्ने चासोका बीच गभर्नर डा. पौडेलले गभर्नर कार्यालय सम्हाल्ने गरी फर्काएका हुन् ।
राष्ट्र बैंकका सहायक सूचना अधिकारी डा. भागवत आचार्यका अनुसार भट्टको आर्थिक अनुसन्धान विभागबाट गभर्नरको कार्यालयमा सरुवा भएको छ । कार्यकारी निर्देशक डा. प्रकाश श्रेष्ठ अनिवार्य अवकाशमा गएसँगै उनको ठाउँमा भट्टलाई ल्याइएको हो ।
अब उनले गभर्नर कार्यालयको नेतृत्व गर्नेछन् ।
डा. भट्ट गभर्नरका प्रत्याशी थिए । तर, तत्कालीन कामु गभर्नर नीलम ढुंगानाले उनको राजीनामा स्वीकृत नगरेपछि उनी गभर्नरको दौडबाट बाहिरिएका थिए ।
