काठमाडौँबाट भारतको नयाँ दिल्ली उड्न लागेको एयर इन्डियाको जहाजमा बम रहेको भन्ने सूचना भ्रामक रहेको खुलेको छ । नागरिक उड्डयन प्राधिकरणका सूचना अधिकारी ज्ञानेन्द्र भूलका अनुसार एयर इन्डियाको २१५ नम्बरको जहाजमा बम राखिएको सूचना आएपछि चेकजाँच गर्ने क्रममा बम फेला नपरेको हो ।
‘जहाज सर्च गर्दा केही भेटिएन, जहाजबाट ओरालिएका यात्रुहरू चढाउन थालिएको छ’ उनले भने, ‘६ बजेतिर उडान हुन्छ होला ।’
सोमबार उक्त जहाज काठमाडौँमा अवतरण भएपछि भारतबाट जहाजमा बम राखिएको सूचना आएको थियो । नेपाली सेना र नेपाल प्रहरीको टोलीले बमको खोजी गर्न थालेको थियो । तर केही नभेटिएपछि पुनः उडान गर्न लागिएको हो ।
सो जहाज आज अपराह्न ३ः५० बजे दिल्ली उड्ने तयारी थियो ।
