भैरहवास्थित गौतमबुद्ध अन्तर्राष्ट्रिय विमानस्थलमा दुइ अन्तर्राष्ट्रिय एयरलाइन्स कम्पनीले नियमित उडान गर्ने भएका छन् । नेपाल नागरिक उड्डयन प्राधिकरणका सूचना अधिकारी ज्ञानेन्द्र भुलका अनुसार २७ सेप्टेम्बर (११ कात्तिक)बाट सुरु हुने ‘वीन्टर सिजन’ सुरु हुनासाथ अन्तर्राष्ट्रिय एयरलाइन्स कम्पनीले भैरहवाबाट उडान गर्न लागेका हुन् ।
हालसम्म कुवेतबाट आउने जजीरा एयरलाइन्स र संयुक्त अरब इमिरेट्स (युएई)को दुबईबाट आउने फ्लाई दुबईले भैरहवामा विमानस्थलमा नियमित उडान गर्ने पक्का भइसकेको छ ।
कुवेतबाट आउने जजीरा एयरलाइन्सले १२ कात्तिकदेखी भैरहवाबाट हप्तामा ३ उडान गर्ने भएको छ । जजीराले सातामा मंगलबार, बिहीबार र शनिबार बिहान ७ः३० बजे कुवेतबाट भैरहवा अवतरण गर्नेछ । भैरहवाबाट बिहान ८ः३० बजे कुवेत फर्कनेछ ।
नागरिक उड्डयन प्राधिकरणबाट उडान तालिकासमेत पाइसकेपछि जजीराले टिकेट बुकिङ पनि लिइरहेको छ ।
फ्लाई दुबई भने नेपालमै पहिलोपटक ‘एट फ्रिडम’ (आठौँ ट्राफिक स्वतन्त्रता)सहित उडान गर्नेछ । एउटा देशको वायुसेवा कम्पनीले अर्को देशमा गएर एउटा विमानस्थलबाट अर्को विमानस्थलमा उडान गर्नुलाई एट फ्रिडम भन्ने गरिन्छ ।
फ्लाई दुबईको जहाज दुबईबाट दिउँसो १ः४५ मा भैरहवा विमानस्थलमा अवतरण गर्नेछ भने भैरहवाबाट दिउँसो ३ः३० बजे काठमाडौँ विमानस्थलमा अवतरण गर्नेछ । फ्लाई दुबईको जहाज काठमाडौँबाट अपरान्ह ४ः३० बजे दुबईका लागि उड्नेछ ।
फ्लाई दुबई नोभेम्बर ९ (कात्तिक २४)बाट दुबई–भैरहवा–काठमाडौँ–दुबई गन्तव्यमा दैनिक एक उडान गर्नेछ ।
अरु २ एयरलाइन्स पनि तयारीमा
जजीरा र फ्लाई दुबईले भैरहवाबाट उडान गर्ने तालिका तय भइसक्दा अन्य एयरलाइन्स कम्पनीले पनि भैरहवाबाट उडान गर्ने चासो देखाएका छन् । अक्टोबर २ (असोज १६) बाट काठमाडौँमा नियमित उडान सुरु गरेको थाई एयर एसियाले पनि भैरहवाबाट सातामा ४ वटा उडान गर्ने अनुमति पाएको छ । थाई एयर एसियाले अक्टोबर २७ (कार्तिक ११) भित्रै भैरहवा उडान गर्ने गरी तालिका पेश गर्ने जनाएको छ ।
राष्ट्रिय ध्वजाबाहक नेपाल वायुसेवा निगमले भैरहवा विमानस्थलमा हरेक हप्ताको मंगलबार उडान गर्दै आएको छ । नेपाल एयरलाइन्सको जहाज सोमबार काठमाडौँबाट मलेसिया जान्छ र मंगलबार मलेसियाबाट भैरहवा आउँछ । भैरहवाबाट काठमाडौँ आउने गरेको छ ।
एयर अरेबियाले पनि भैरहवाबाट उडान गर्ने तयारी अघि बढाएको छ । यद्यपी, एयर अरेबियाले उडान तालिका भने पेश गरिसकेको छैन । नेपालकै अन्तर्राष्ट्रिय वायुसेवा प्रदायक हिमालय एयरलाइन्सले पनि भैरहवाबाट उडान गर्न सकारात्मक रहेको बताउँदै आएको छ ।
