काठमाडौँ–मन्थली (रामेछाप) नियमित हवाई उडानको तालिका बमोजिम सहज उडान नभइरहेको गुनासो आएपछि नेकपा एमालेको टिम मन्त्रालयमा डेलिगेशन गएको छ । नेकपा एमालेका पोलिट्ब्यूरो सदस्य एवम् रामेछाप जिल्ला इन्चार्ज कमल चौलागाईको नेतृत्वमा संस्कृति, पर्यटन तथा नागरिकक उड्डयनमन्त्री बद्री पाण्डेलाई भेट्न गएको टोलीले काठमाडौँ–मन्थली नियमित र सहज उडानको प्रबन्धका लागि अपिल गरेको छ ।
एमाले रामेछापको डेलिगेशन लगत्तै मन्त्री पाण्डेले नागरिक उड्डयन प्राधिकरण (क्यान)ले हालै स्वीकृत गरेको उडान तालिका अनुसार नियमित उडान सहज रुपमा नभइरहेको विषयमा तत्काल आवश्यक कदम चाल्न क्यानलाई निर्देशन दिएका छन् । मन्त्रीको निर्देशनसँगै क्यान र एयरलाइन्स अपरेटर्स एसोसियशनले सहजीकरण गरि हप्तामा काठमाडौँ–मन्थली ६ उडान राख्ने निर्णय गरेको बताइएको छ ।
डेलिगेशन टिममा रहेकी एमाले केन्द्रीय सदस्य गीता कार्कीका अनुसार हाल मन्थलीबाट सोलुखुम्बुको लुक्ला उडान गरिरहेका तारा एयर, समिट एयर र सिता एयरले हप्तामा दुइ दुइ उडान गर्ने गरि साप्ताहिक रुपमा काठमाडौँ–मन्थली ६ उडान राख्ने निर्णय भएको छ ।
यसअघि नेकपा एमाले रामेछापमार्फत महासचिव शंकर पोखरेललाई काठमाडौँ–मन्थली नियमित उडानको प्रबन्ध मिलाइदिन अनुरोध भएको बताइएको थियो । त्यस पश्चात महासचिव पोखरेलले संस्कृति, पर्यटन तथा नागरिक उड्डयनमन्त्री बद्री पाण्डेलाई यसको सहजीकरण गरिदिन अनुरोध गरेका थिए । त्यस अनुसार आज असोज २० गते नेकपा एमालेका पोलिट्ब्यूरो सदस्य एवम् रामेछाप जिल्ला इन्चार्ज कमल चौलागाईको नेतृत्वमा केन्द्रीय सदस्य गीता कार्की, प्रदेश सदस्य प्रेम तामाङ, जिल्ला कमिटी सदस्य टेक बहादुर श्रेष्ठ लगायतको टोली फलो अप डेलिगेशनमा गएको थियो ।
