मैनाली इन्डष्ट्रीज प्रा.लि.ले उत्पादन गर्दै आएका टिस्यू पेपर ब्राण्ड ‘प्यासन’ले बजारमा उल्लेख्य उपस्थिति जनाउन थालेको छ । फेस टिस्यू, बाथरुम टिस्यू, न्यापकिन पेपर लगायतका ‘टिस्यू पेपर रेन्ज’का सबै उत्पादन बनाउँदै आएको मैनाली इन्डष्ट्रीले यस्ता उत्पादनमा मुलुकलाई आत्मनिर्भर बनाउने लक्ष्य राखेको उद्योगका सञ्चालक प्रेमहरि मैनालीले बताएका छन् ।
कम्पनीले हालै मात्रै हाउस अफ राजकर्णिकारले काठमाडौँको भृकुटीमण्डपमा आयोजना गरेको प्रदर्शनीमा पनि सहभागीता जनाएको थियो । नेपाली उत्पादनले क्रमशः बजार पाइरहेका बेला उक्त मेलामा पनि सहभागीता जनाइएको मैनालीले जानकारी दिएका छन् ।
उनका अनुसार नेपाली टिस्यू पेपरको बजारको कुल मागमध्ये ९० प्रतिशत बढी माग आन्तरिक उत्पादनले धान्न सक्ने भएको छ । टिस्यू पेपर लगायतका वस्तुमा नेपाल आत्मनिर्भर उन्मुख रहेको बताउँदै उनले देशब्यापी रुपमा स्वदेशी उत्पादनको उपयोग बढाउने खालको नीति आवश्यक रहेको बताएका छन् । नेपालमै स्तरीय ब्राण्ड उत्पादन गर्न सकिन्छ भन्ने सन्देश दिन आफूहरुले मेहनत गरिरहेको मैनालीको भनाइ छ ।
देशमा केही सम्भावना नै छैन भन्ने भाष्य गलत रहेको बताउँदै मैनालीले सम्भावना पहिचान गरेर उत्पादनको काममा लाग्न सके मुलुकभित्रै पर्याप्त अवसर रहेको पनि बताएका छन् । उनका अनुसार टिस्यू पेपर अब अति आवश्यक वस्तु भइसकेको बताउँदै यसलाई अत्यावश्यक वस्तुको सूचीमा राख्न आवश्यक छ ।
मुलुकभित्रै उत्पादन हुने भएपनि यसका कतिपय कच्चा पदार्थ आयात गर्नुपर्ने बाध्यता रहेको बताउँदै मैनालीले सरकारले कच्चा पदार्थमा पनि अन्तःशुल्क लगाउने गरेको गुनासो गरेका छन् । उनले उत्पादनका लागि आवश्यक पर्ने कच्चा पदार्थ आयात गर्दा अन्तःशुल्क लाग्ने प्रावधान हटाउन समेत माग गरेका छन् ।
मैनालीले सबै प्रयोगकर्ताहरुलाई स्वदेशी उत्पादन उपयोग गर्न पनि आग्रह गरेका छन् ।
