५० करोडको सार्वजनिक निष्काशन गर्ने लक्ष्यसहित पूँजी संकलनमा लागेको जनता एग्रो एण्ड फरेष्ट्री लिमिटेडले संस्थापक सेयर संकलन करिब करिब टुङ्ग्याएको छ । कम्पनीका संस्थापक तथा अध्यक्ष पवन कुमार गोल्यानका अनुसार २ अर्ब पूँजीको जनता एग्रोले असोज मसान्तभित्र संस्थापक सेयर संकलनको काम सक्नेछ ।
हालसम्म १ अर्ब १५ करोड रुपैयाँ संकलन भइसकेको छ भने ३५ करोड केही दिनमै आइपुग्नेछ । यसरी १ अर्ब ५० करोड लगानी संकलन भइसकेपछि कम्पनीले बाँकी ५० करोड लगानी सर्वसाधारण लगानीकर्तामा सेयर निष्काशन गरेर संकलन गर्नेछ ।
‘हामीले संस्थापकबाट १ अर्ब ५० करोड लगानी ल्याउने र बाँकी ५० करोड आईपीओमार्फत संकलन गर्ने गरि पूँजी संरचना बनाएका छौँ, हालसम्म १ अर्ब १५ करोड लगानी आइसकेको छ, ३५ करोड पनि केही दिनमै आइसक्छ’ अध्यक्ष गोल्यानले भने, ‘यसपछि हामी प्रोमोटरको लागि क्लोज गर्छौ, असोज मसान्तमा प्रोमोटर सेयर संकलनको काम रोक्छौँ र आईपीओको प्रक्रिया अघि बढाउँछौँ ।’
उनका अनुसार यसपछि कम्पनीले बाँकी ५० करोड लगानी संकलनका लागि आईपीओ निष्काशनको प्रक्रिया अघि बढाउनेछ । सम्भवतः चालु आर्थिक वर्षभित्रै कम्पनीको आईपीओ आउन सक्ने बताइएको छ ।
नेपालकै सबैभन्दा ठूलो कृषि कम्पनीका रुपमा यसलाई विकास गरिने लक्ष्य लिइएको छ । उद्योगी गोल्यान नेतृत्वको गोल्यान समूहमार्फत १५० बिघा जमिनमा भइरहेको व्यवसायिक कृषि अब जनता एग्रो एण्ड फरेष्ट्री लिमिटेडमार्फत सञ्चालन हुनेछ भने प्रेम बहादुर लामाले चलाइरहेको बनेपा र नवलपूरको आशापूरी अर्गानिक प्रा.ली. पनि अब जनता एग्रो एण्ड फरेष्ट्री लिमिटेड मातहत नै रहने भएको छ । ‘माटो र आशापूरी दूबै ब्राण्ड अब जनता एग्रोका ब्राण्ड हुन्’ गोल्यानले भने ।
कम्पनीका सञ्चालहरुमा पवन गोल्यान अध्यक्ष छन् भने उपाध्यक्षमा राजेशकाजी श्रेष्ठ, प्रबन्ध निर्देशकमा भोजबहादुर शाह छन् र ‘अपरेशन डाइरेक्टर’मा प्रेम लामा छन् ।
निर्देशकहरुमा कमलेश कुमार अग्रवाल, नरबहादुर कार्की, उपेन्द्र केशरी न्यौपाने, केशब बहादुर रायमाझी र परितोष पौड्याल रहेका छन् ।
‘एग्रिकल्चर सेक्टर’को बृहत व्यवसायीकरणको लक्ष्यसहित आम सर्वसाधारणको समेत स्वामित्व रहने गरि मुलुककै ठूलो कृषि कम्पनी बनाउन लागिएको अध्यक्ष गोल्यानले बिजनेशपानासँग बताएका छन् ।
