नेपालको निजी क्षेत्रको अन्तर्राष्ट्रिय एयरलाइन्स कम्पनी हिमालय एयरलाइन्सले आगामी भदौ ४ गतेदेखि कुवेतमा पुनः उडान गर्ने भएको छ । हिमालय एयरलाइन्सले काठमाडौँ–कुवेत–काठमाडौँ उडान गर्न लागेको हो ।
काठमाडौँ–कुवेत–काठमाडौँ रुटको उडान पुनः सुरु भएपछि दुई राष्ट्रका नागरिक बीचको सम्बन्धलाई मजबुत बनाउने, पर्यटन र व्यापारलाई प्रवर्धन गर्न मद्दत पुग्ने विश्वास हिमालय एयरलाइन्सले लिएको छ ।
सुरुवाती चरणमा यस रुटमा हप्ताको एउटा उडान गरिने कम्पनीले जनाएको छ । कुवेतका लागि जनरल सेल्स एजेन्ट (जीएसए)मा सिजर्स ट्राभल ग्रुपलाई नियुक्त गरिएको हिमालय एयरले जनाएको छ ।
हिमालय एअरलाइन्स्सँग हाल ४ वटा विमानहरू छन् । हिमालय एअरलाइन्सले हाल मध्यपूर्व र दक्षिण एशियाका प्रमुख राष्ट्रहरू संयुक्त अरब इमिरेट्स, मलेसिया, कतार, साउदी अरेबिया, कुवेत, बङ्गलादेश र चीनमा उडान गर्दै आएको छ ।
