डिभाइन हेल्थकेयर लिमिटेडले आईपीओ निष्काशन गर्ने भएको छ। कम्पनीले आईपीओ निष्काशनको लागि मुक्तिनाथ क्यापिटललाई बिक्री प्रबन्धक नियुक्त गरेको छ।
सम्झौतामा डिभाइन हेल्थकेयरको तर्फबाट अध्यक्ष युवराज श्रेष्ठ र मुक्तिनाथ क्यापिटलको तर्फबाट प्रमुख कार्यकारी अधिकृत कबिन्द्र विक्रम ध्वज जोशीले हस्ताक्षर गरेका छन् । कम्पनीले जारी पूँजीको २० प्रतिशत साधारण शेयर सर्वसाधारणहरुलाई विक्री गर्न लागेको हो । उक्त कार्यक्रममा कम्पनीका प्रबन्ध सञ्चालक सुसान्त मुरारका तथा सञ्चालकहरु मनोज के. सि. र विनय तोदी समेत सहभागिता रहेको थियो ।
वि.स. २०७४/७/१४ मा स्थापित डिभाइन हेल्थकेयर लिमिटेड भरतपुर महानगरपालिका-१६, विजय नगर, चितवनमा अवस्थित औषधि उत्पादक कम्पनी हो । कम्पनीले औषधि व्यवस्था विभाग (DDA), स्वास्थ्य तथा जनसंख्या मन्त्रालयबाट उत्पादन तथा बजारीकरण सम्बन्धी दर्ता तथा स्वीकृति प्राप्त गरी गुणस्तरीय मानव औषधिहरूको बिक्री वितरण गर्दै आएको छ । कम्पनीले हाल ६७ प्रकारका औषधिहरू उत्पादन तथा नेपाली बजारमा बिक्री वितरण गर्दै आएको छ । कम्पनीद्वारा उत्पादित औषधिहरूमध्ये Acidex, Nexofast 5 Pregex Range लगायतका औषधिहरू बजारमा उल्लेखीय मात्रामा बिक्री वितरण हुँदै आइरहेका छन् । कम्पनीले यहि माघ महिनादेखि COPD ( Chronic Obstructive Pulmonary Disease) का बिरामीहरूका लागि आवश्यक DPI (Dry Powder Inhaler) औषधिको समेत उत्पादन सुरु गर्ने तयारी गरेको छ ।
करिब १ बिघा क्षेत्रफलमा फैलिएको कम्पनी विगत तीन आर्थिक वर्षदेखि नाफामा सञ्चालन हुँदै आएको तथा हालसम्म बैंक तथा वित्तीय संस्थाबाट ऋण नलिई (Loan Free) मुख्य रूपमा स्वपूँजीबाट सञ्चालन भइरहेको कम्पनीले जनाएको छ । कम्पनीको देशभर १२५ भन्दा बढी वितरकहरूको सञ्जाल रहेको छ । साथै, सार्वजनिक निष्काशनबाट प्राप्त पूँजीलाई कम्पनीले नयाँ प्रविधिको विस्तार, नयाँ औषधिहरूको विकास, विद्यमान औषधिहरूको गुणस्तर सुधार तथा उत्पादन प्रक्रियालाई थप प्रभावकारी, सुरक्षित र गुणस्तरीय बनाउन अनुसन्धान तथा विकास (Research & Development) मा प्राथमिकताका साथ उपयोग गर्ने लक्ष्य राखेको छ ।
