चार पटकको विश्वकप फुटबल विजेता जर्मनीले फिफा विश्वकप २०२६ मा समूह ‘ई’ अन्तर्गत आफ्नो पहिलो खेलमा डेब्यु टोली कुरासाओमाथि ७–१ को फराकिलो जित दर्ता गरेको छ ।
जर्मनीले खेलको छैटौं मिनेटमै फेलिक्स निमेचाको गोलबाट अग्रता लियो । तर २१औं मिनेटमा लिभानो कोमेनेन्सियाले विश्वकपमा कुरासाओका लागि पहिलो गोल गर्दै खेल १–१ को बराबरीमा ल्याए ।
३८औं मिनेटमा निको स्लोटरबेकले गोल गर्दै टोलीलाई पुनः अग्रता दिलाए । पहिलो हाफको इन्जुरी समयमा काइ हाभर्ट्जले पेनाल्टीमार्फत गोल गरेपछि जर्मनी ३–१ ले अघि बढ्यो ।
दोस्रो हाफको सुरुमै जमाल मुसियालाले गोल थपे । त्यसपछि नाथानियल ब्राउन, डेनिज उन्डाभ र हाभर्ट्जले थप गोल गर्दै जर्मनीको जितलाई एकतर्फी बनाए।
हाभर्ट्जले २ गोल गरे भने निमेचा, स्लोटरबेक, मुसियाला, ब्राउन र उन्डाभले समान १–१ गोल गरे । जोशुआ किमिखले २ असिस्ट प्रदान गरे ।
कुरासाओले विश्वकपमा पहिलो पटक सहभागिता जनाएको हो । करिब एक लाख ५५ हजार जनसंख्या रहेको क्यारिबियन टापु राष्ट्रले पहिलोपटक विश्वकपमा स्थान बनाएको हो ।
