चीनसँगको प्रमुख ब्यापारिक नाका ‘तातोपानी नाका’ असार अन्तिमदेखि बन्द हुँदा आयात प्रभावित भएको छ । वर्षाका कारण ठाउँ ठाउँमा पहिरो खस्दा सडक अवरुद्द भएपछि दुइ देशबीचको ब्यापार प्रभावित भएको हो ।
चीनबाट हुने आयातको ५० प्रतिशत हिस्सा तातोपानी नाका हुँदै आयात हुन्छ । तर, अहिले वर्षा र पहिरोले सडक अवरुद्द भएपछि उक्त नाकाबाट हुने आयात प्रभावित भएको र कतिपय आयातकर्ताले केरुङ (रसुवागढी) र कोरला नाकाबाट सामान ल्याउन बाध्य हुनु परेको हिमालय सीमापार वाणिज्य संघका महासचिव रामचन्द्र पराजुलीले जानकारी दिएका छन् ।
लत्ताकपडादेखि हाइड्रोका इक्वीपमेन्ट सम्मको आयात प्रभावित
तातोपानी नाकाबाट लत्ताकपाडदेखि हल्का सवारी साधनसमेत आयात हुने गर्छ । साथै, ठूला आयोजनाका औजार, उपकरण पनि यो नाका हुँदै ल्याउने गरिन्थ्यो । तर, अहिले बाह्रबीसे–तातोपानी खण्ड अवरुद्द हुँदा लत्ताकपडा, फलफूल तथा जलविद्युत आयोजनाका इक्वीपमेन्ट सम्मको आयात प्रभावित बनेको महासचिव पराजुलीको भनाइ छ ।
चिनियाँ भूगोलमा सडक राम्रो भएपनि नेपालतर्फ पटकपटक पहिरो जाने समस्याले गर्दा समस्या भइरहेको आयातकर्ता व्यवसायीहरुको भनाइ छ । सरकारले पहिरो पन्छाएर बाह्रै महिना सहज रुपमा आयात–निर्यात गर्न सकिने गरी पूर्वाधार बनाउने योजना बनाएपनि त्यस अनुसारको काम हुन नसक्दा हरेक वर्ष असजिलो अवस्था भोग्नु परिरहेको उनीहरुको गुनासो छ ।
दुइ ठूला पहिरो सधैँका बाधक
यस खण्डमा दुइ वटा ठूला पहिरो छन् । सिन्धुपाल्चोक जिल्लामा पर्ने इको र डाक्लाङ पहिरोले गर्दा हरेक वर्षको वर्षायामदेखि दशैँ तिहार जस्ता ठूला चाडपर्वको मुखमा आयात अस्तव्यस्त हुने गरेको महासचिव पराजुलीको भनाइ छ ।
‘०७२ सालको भूकम्पले गर्दा त्यस भेगमा धेरै स्थानमा जमिन चिराचिरा परेको छ, अहिले केही वर्षयता हरेक वर्ष पहिरो जाने र सडक अवरुद्द हुने गरेको छ’ उनी भन्छन्, ‘इको र डाक्लाङ पहिरोको दीर्घकालिन समाधान खोज्नु आवश्यक छ ।’
यदि अझै केही समय मनसुन सक्रिय रहने हो भने यसपाली पनि दशैँ, तिहार र छठ जस्ता ठूला चाडपर्वका लागि अर्डर गरिएका सामान सहजै आउन नसक्ने अवस्था रहेको उनको भनाइ छ । चाडवाडलाई लक्षित गरी व्यवसायीहरुले लत्ताकपडा, फलफूल जस्ता सामानहरु अर्डर गरिसकेका तर, बाटो सूचारु नभए आयात प्रभावित हुने र चाडवाडमा महँगी बढ्ने जोखिम रहेको महासचिव पराजुली बताउँछन् ।
