अपि पावर कम्पनी लिमिटेडको सहायक कम्पनी दिब्यज्योती हाइड्रोपावर लिमिटेडद्धारा निर्माणाधीन ५० मेगावाट क्षमताको मर्स्याङ्दी बेसी जलविद्युत आयोजनाको वित्तिय व्यवस्थापन सम्पन्न भएको छ । बुधबार उक्त आयोजनाको ऋण लगानी सम्बन्धी सम्झौतापत्रमा कम्पनी र बैंकबीच सम्झौता भएको हो।
उक्त आयोजना गण्डकी प्रदेश, लमजुङ जिल्लाको बेसी शहर नगरपालिका तथा मर्स्याङ्दी गाउँपालिका भई बहने मर्स्याङ्दी नदीमा निर्माणाधीन रहेको छ । उक्त आयोजनाको कुल अनुमानित लागत रु.११ अर्ब ३० करोड रहेकोमा रु.७ अर्ब ५० करोड सिटिजन्स बैंक इन्टरनेशनल लिमिटेडको अगुवाईमा सह – वित्तीयकरण कर्जा व्यवस्थापन गर्ने गरी ऋण सम्झौतापत्रमा हस्ताक्षर भएको हो । रु. ११ अर्ब ३० करोड अनुमानित लागत मध्ये रु.३ अर्ब ८० करोड कम्पनीले स्वपूँजी मार्फत व्यवस्थापन गर्ने छ।
कम्पनीको उक्त आयोजना निर्माण सम्पन्न गर्ने अवधि ४ वर्षको रहेता पनि आगामी ३० महिना भित्रमा काम सम्पन्न गर्ने लक्ष्य सहित निर्माण कार्य अघि बढाईएको कम्पनीले जनाएको छ । आयोजनाबाट उत्पादित बिजुली आयोजनाको विद्युत गृहबाट करिब ८ किलोमिटर टाढा रहेको नेपाल विद्युत प्राधिकरणको (१३२ केभि क्षमताको) उदिपुर सब-स्टेशनमा लगि राष्ट्रिय ग्रिडमा प्रवाह गरिनेछ ।
आयोजनाको विद्युत खरिद विक्रि सम्झौता नेपाल विद्युत प्राधिकरण र कम्पनीका बिच २०७५ भाद्र १० मा सम्पन्न भएको थियो तथा कम्पनीले विद्युत विकास विभाग, उर्जा मन्त्रालयबाट २०७४ असोज १ गते उत्पादन अनुमतिपत्र प्राप्त गरेको थियो।
