स्वतन्त्र ऊर्जा उत्पादकहरुको संस्था नेपाल (इप्पान)भित्र चुनावी माहोल क्रमशः बढिरहेको छ । जेठ २९ गते साधारणसभा र निर्वाचनको मिति तोकिएपछि अहिले अध्यक्षबाहेकका पदमा आकांक्षीहरु खुलिरहेका छन् । इप्पानको आगामी अध्यक्ष हालका वरिष्ठ उपाध्यक्ष मोहन डाँगी स्वतः हुँदैछन् ।
अहिले वरिष्ठ उपाध्यक्ष, ५ जना उपाध्यक्ष, महासचिव, कोषाध्यक्ष र सचिव पदका आकांक्षीहरु खुल्दैछन् । सदस्यका आकांक्षी पनि बढिरहेका छन् ।
हालसम्म वरिष्ठ उपाध्यक्षमा उत्तम ब्लोन, भरत खत्री, हिम पाठक र प्रकाश दुलाललाई आकांक्षीका रुपमा हेरिएको छ ।
त्यसैगरी उपाध्यक्षमा पनि ७ जनाभन्दा बढी आकांक्षी देखिएका छन् । उत्तर कुमार श्रेष्ठ, बलराम खतिवडा, सुशन कर्माचार्य, बिक्रम विष्ट, कविता कँडेल, विजय मोहन भट्टराई लगायतले उपाध्यक्षमा उम्मेदवारी दिने तयारी गरेका छन् । इप्पानमा ५ जना उपाध्यक्ष निर्वाचित हुने प्रावधान छ ।
‘यदि अहिले वरिष्ठ उपाध्यक्षका ४ जना आकांक्षीमध्ये अन्तिममा २ जनाबीच मात्रै प्रतिस्पर्धा हुने भयो भने बाँकी २ जना पनि उपाध्यक्षमै प्रतिस्पर्धा गर्ने हुन्’ इप्पान स्रोत भन्छ, ‘त्यसकारण उपाध्यक्षमा ८÷९ जना आकांक्षी पुग्न सक्छन् ।’
यस्तै, महासचिवमा हालसम्म टीएन आचार्य र मिथुन पौडेलको चर्चा छ । कोषाध्यक्षमा नरेन्द्र बल्लभ पन्त निर्विरोध हुने सम्भावना रहेको बताइन्छ । सचिव पनि ५ जना निर्वाचित हुनेछन् ।
सदस्यहरु १० जना (३ महिलासहित) निर्वाचित हुने प्रावधान रहेकोमा २० जना जति आकांक्षी देखिएका छन् । ‘कार्यसमितिमा प्रवेश गर्दा सदस्यबाटै गर्नुपर्ने प्रावधान रहेकाले अहिले जलविद्युत र ऊर्जा क्षेत्रका हाइप्रोफाइल व्यक्ति र ग्रुपहरुबाट सदस्यमा उम्मेदवारी पर्ने देखिएको छ’ स्रोत भन्छ ।
इप्पानले साधारणसभा प्रयोजनका लागि नयाँ सदस्यतासमेत खुला गरेको छ । जेठ १५ गतेसम्म सदस्यता प्राप्त गर्ने कम्पनीहरु (सदस्यहरु)ले मतदानसमेत गर्न पाउनेछन् । हाल इप्पानमा जलविद्युत र सोलार कम्पनी गरेर कुल ६ सय सदस्य छन् ।
डाँगीको समर्थन कसलाई ?
हालका वरिष्ठ उपाध्यक्ष मोहन डाँगी विधानको प्रावधान अनुसार अब आगामी ३ वर्षका लागि इप्पानको अध्यक्ष बन्दै छन् । अहिले विभिन्न पदका आकांक्षीहरु उनलाई भेट्न र समर्थन गरिदिन अनुरोधसहित पुग्ने गरेका छन् । तर, डाँगीले ‘म स्वतः अध्यक्ष हुँदैछु, मैले कसैलाई पनि यो मेरो उम्मेदवार हो, यो मेरो होइन भनेर भन्न मिल्दैन । मैले यो भन्न थाले भने संस्थाभित्र एकता हुँदैन’ भन्दै आफू तटस्थ बस्ने बताएका छन् ।
