अमेरिकी प्रसिद्ध साप्ताहिक टाइम म्यागजिनले आफ्नो वार्षिक ‘टाइम १०० : द १०० मोस्ट इन्फ्लुएन्सियल पिपुल अफ २०२६’ सूचीमा नेपालका प्रधानमन्त्री बालेन्द्र शाह (बालेन) लाई समावेश गरेको छ। यो सूची विश्वका नेतृत्वकर्ता, नवप्रवर्तक, कलाकार र प्रभावशाली व्यक्तिहरूलाई सम्मानित गर्दै प्रत्येक वर्ष प्रकाशित हुन्छ।
टाइम म्यागजिनले बालेन्द्र शाहको प्रोफाइलमा लेखेको छः “‘अखण्डता बेच्नेहरूलाई पैसा रूखमा फल्छ जस्तो लाग्छ’ भन्दै र्याप गाउँछन् बालेन्द्र शाह, ३५ वर्षीय नेपाली पूर्व हिप–हप स्टार जसले मार्चमा हिमालयन राष्ट्र नेपालको सबैभन्दा कान्छो प्रधानमन्त्रीको रूपमा निर्वाचित भए। उक्त भारी मतले जित उनको जितलाई गत वर्षको घातक सडक आन्दोलनले बल दिएको थियो, जसलाई जेनेरेसन जेडले नेतृत्व गरेको थियो र जसले भ्रष्ट पुरानो राजनीतिक वर्गलाई हटाउन चाहेको थियो। शाह, जसलाई बालेन भनेर चिनिन्छ, सिभिल इन्जिनियरिङ स्नातक हुन्। उनको गम्भीर स्टेज प्रेजेन्स र भ्रष्ट अधिकारीहरूलाई तिखो आलोचना गर्दै चार वर्षअघि काठमाडौंको मेयर बने र अहिले ३ करोड नेपालीको नेता बनेका छन्। बालेनको उदय युवा क्रान्ति जत्तिकै दक्षिण एसियाको पुरानो वंशवादी राजनीतिको पूर्ण अस्वीकार पनि हो, जसले क्षेत्रीय स्थापित वर्गलाई कम्पन दिएको छ। मेयरका रूपमा बालेनले फोहोर व्यवस्थापन, शिक्षा र स्वास्थ्य सेवामा सुधार गरे। अब प्रश्न यो छ– टुपाक शकुर र ५० सेन्टका प्रशंसक उनले स्थानीय सफलतालाई राष्ट्रिय स्तरमा अनुवाद गर्न सक्छन् कि सक्दैनन्? ‘नयाँ र पुराना सबै राजनीतिज्ञ चोर हुन्’ भन्दै एक पटक सामाजिक सञ्जालमा पोस्ट गरेका थिए बालेन। नेपालीहरू आशा गर्छन् कि उनी आफैंलाई गलत साबित गर्नेछन्।”
सम्मानको अर्थ
टाइम१०० सूची विश्वव्यापी रूपमा अत्यन्त प्रतिष्ठित मानिन्छ। यसले कुनै व्यक्तिको विश्व मञ्चमा प्रभाव, नेतृत्व क्षमता र परिवर्तनकारी भूमिकालाई मान्यता दिन्छ। बालेन्द्र शाहको लागि यो सम्मानले नेपालको युवा–केन्द्रित राजनीतिक परिवर्तन, भ्रष्टाचारविरोधी अभियान र दक्षिण एसियाली वंशवादी राजनीतिप्रतिको विद्रोहलाई अन्तर्राष्ट्रिय मान्यता दिएको छ। उनी चार वर्षमा मात्र काठमाडौं मेयरबाट देशको प्रधानमन्त्री बन्न सफल भएका छन्। यो जित २०२५ को जेनेरेसन जेड आन्दोलनको परिणाम हो, जसले पुरानो नेतृत्वलाई चुनौती दियो। टाइमले उनलाई ‘पपुलिस्ट युवा क्रान्ति’ को प्रतीक भनेको छ।
अन्य विश्व नेताहरू
टाइम१०० को २०२६ सूचीमा बालेन्द्र शाह ‘लिडर्स’ क्याटेगोरीमा परेका छन्। उनीसँगै विश्वका शीर्ष नेता र प्रभावशाली व्यक्तिहरू समावेश छन्। जसमा अमेरिकी राष्ट्रपति डोनाल्ड ट्रम्प, चिनियाँ राष्ट्रपति सी जिनपिङ, पोप लियो XIV, बंगलादेशका प्रधानमन्त्री तारिक रहमान, जापानकी प्रधानमन्त्री सानाए टाकाईची (जापानकी पहिलो महिला प्रधानमन्त्री), बेलायतका प्रधानमन्त्री केइर स्टार्मर, इजरायली प्रधानमन्त्री बेन्जामिन नेतान्याहु, क्यानडाका प्रधानमन्त्री मार्क कार्नी, मेक्सिकोकी राष्ट्रपति क्लाउडिया शेनबाउम, न्युयोर्कका मेयर जोहरान मामदानी लगायत छन्। सूचीमा कलाकार, नवप्रवर्तक, टाइटन्स र आइकन क्याटेगोरीका अन्य व्यक्तिहरू पनि छन्।
प्रधानमन्त्री बालेन्द्र शाहले यसअघि २०२३ मा टाइम१०० नेक्स्ट (उदीयमान नेताहरू) सूचीमा पनि स्थान पाएका थिए। अहिलेको सम्मानले उनको राष्ट्रिय तथा अन्तर्राष्ट्रिय प्रभावलाई थप उजागर गरेको छ। नेपालीहरूका लागि यो गौरवको क्षण हो, जसले नेपाललाई विश्व मञ्चमा चिनाउने अवसर पनि दिएको छ।
