बुधबारदेखि राष्ट्रिय आर्थिक गणना सुरु भएको छ । राष्ट्रिय तथ्यांक कार्यालयले देशब्यापी रुपमा आर्थिक गणना सुरु गरेको हो ।
राष्ट्रिय तथ्यांक कार्यालयका उपप्रमुख तथ्याङ्क अधिकारी एवं प्रवक्ता ढुण्डीराज लामिछानेले करिब ४ हजार गणकहरूलाई कार्यक्षेत्रमा परिचालन गरिएको जानकारी दिएका छन् । उनका अनुसार आर्थिक गणना अबको २ महिना ७ दिनसम्म जारी रहनेछ ।
‘अर्थतन्त्र मापनका लागि आर्थिक गणना’ भन्ने नाराका साथ सुरु गरिएको यस गणना वस्तु तथा सेवा उत्पादन गर्ने, वितरण गर्ने र आर्थिक कारोबार गर्ने स्थायी प्रतिष्ठानहरू समेटिनेछन् ।
संघीय, प्रादेशिक र स्थानीय तहसम्मको अर्थतन्त्रको आकार पत्ता लगाउन यो सर्वेक्षण गर्न लागिएको हो ।
गणनालाई सफल बनाउन नेपाल उद्योग वाणिज्य महासंघ, नेपाल उद्योग परिसंघ, चेम्बर अफ कमर्स लगायतका निजी क्षेत्रका छाता संगठनहरूसँग समन्वय गरिएको छ ।
