सरकारले पेट्रोलियम पदार्थको खपत घटाउनको लागि सवारीसाधनमा जोर बिजोर नियम लगाउने सक्ने संकेत गरेको छ। आज बसेको मन्त्रिपरिषद बैठकपछि बैठकका निर्णय सुनाउदै संघीय मामिला तथा सामान्य प्रशासन मन्त्री प्रतिभा रावलले आवश्यक परे सवारीसाधनमा जोर बिजोर नियम लगाउने बताएकी हुन् ।
उनले सरकार आम नागरिक संगै रहेकोले यो सरकारले जनताको पीडा बुझ्ने बताइन् । पेट्रोलियम पदार्थको आपूर्ति सुनिश्चित गर्नको लागि सरकारले विभिन्न कदम चलिसकेको र आवश्यक परे जोर बिजोर पनि लगाउने उनले उल्लेख गरेकी हुन् ।
सरकारले पेट्रोलियम पदार्थ खपत घटाएर आपूर्ति सुनिश्चित गर्नको लागि शनिवार र आइतबार सार्वजनिक विदा दिने निर्णय गरिसकेको छ, त्यस्तै थोक ब्रिक्रि नियन्त्रण र उच्च पदस्थको इन्धन कटौती समेत गरिसकेको छ। साथै आज बसेको मन्त्रिपरिषदको बैठकले पेट्रोल, डिजेल र मट्टितेलको आयातमा लाग्दै आएको २ थरी कर घटाएको छ। आजको मन्त्रिपरिषदले पेट्रोल, डिजेल र मट्टितेलको आयातमा लाग्दै आएको भन्सार महशुलमा ५० प्रतिशत र पूर्वाधार विकास करमा ५० प्रतिशत छुट प्रदान गर्ने निर्णय गरेको छ।
त्यस्तै सरकारले पेट्रोल/डिजेल गाडीलाई विद्युतीय गाडीमा रुपान्तरण गर्नको लागि कानूनी प्रबन्ध गर्ने घोषणा गरिसकेको छ । यसका अलावा आवश्यक परे जोर बिजोर प्रणाली लागु गर्ने सरकारले जनाएको हो।
सरकारले ऊर्जा बचत गर्न र संयमित बन्न पनि आग्रह गरेको छ।
