नेपाल उद्योग वाणिज्य महासंघको वरिष्ठ उपाध्यक्ष पदमा रामचन्द्र सांघाईले उम्मेदवारी दिने घोषणा गरेका छन् । मंगलबार बिहान बिजनेश पानासँगको कुराकानीमा पूर्व उपाध्यक्षसमेत रहेका सांघाईले आफूले आसन्न निर्वाचनमा वरिष्ठ उपाध्यक्ष पदमा उम्मेदवारी दिने पक्का भएको बताएका हुन् ।
पूर्व अध्यक्षहरुसहित महासंघप्रति चासो राख्ने उद्योगी व्यवसायीहरुसँग छलफल र संवाद गरेर आफूले वरिष्ठ उपाध्यक्षमा उम्मेदवारी निर्णय गरेको उनको भनाइ छ । ‘मैले वरिष्ठ उपाध्यक्षमा उम्मेदवारी दिने पक्का भयो’ उनले भने, ‘मेरो उम्मेदवारी स्वभाविक छ । तामझामका साथ घोषणा गर्नुपर्दैन, घोषणा बराबर नै छ ।’
उनले आफूलाई क–कसले समर्थन गरेका छन् भन्ने विषयमा भने अहिले मुख खोलेका छैनन् । पूर्व अध्यक्षहरु र महासंघ भित्रका गतिविधिमा चासो राख्ने सबै पक्षसँग छलफल गरेरै आफू यो निर्णयमा पुगेको उनको भनाइ छ । ‘क–कसको समर्थन छ, क–कसले मलाई अघि बढ्न अनुरोध गर्नुभयो भन्ने कुरा अहिले नै सार्वजनिक गर्नु राम्रो हुँदैन’ उनले थपे, ‘तर, सबैको सल्लाह लिएरै म अघि बढ्ने निर्णयमा पुगेको हुँ ।’
महासंघको वरिष्ठ उपाध्यक्षमा हालका उपाध्यक्ष हेमराज ढकालले यसअघि नै उम्मेदवारी घोषणा गरिसकेका छन् ।
